കൊച്ചി: സൈബർ ബുള്ളിയിങിന് നേതൃത്വം നല്കുന്നവരിലൊരാളെന്നാരോപിച്ച് നടി ഹണി റോസ് സാമൂഹിക പ്രവർത്തകൻ രാഹുല് ഈശ്വറിനെതിരെ പൊലീസില് പരാതി നല്കി. ബിസിനസ് വ്യക്തിയായ ബോബി ചെമ്മണൂരിനെതിരെ നല്കിയ പരാതിയുടെ ഗൗരവം കുറയ്ക്കാനും, ജനമാധ്യമങ്ങളെ തനിക്കെതിരായി തിരിക്കാനും രാഹുല് ഈശ്വർ ശ്രമിക്കുന്നതായി ഹണി റോസ് ആരോപിച്ചു.
രാഹുല് ഈശ്വറും ബോബി ചെമ്മണൂരിന്റെ പിആര് ഏജന്സികളും ഏകോപിതമായ രീതിയില് തനിക്കെതിരേ സൈബർ ആക്രമണം നടത്തുകയാണ്. ഇത് തന്റെ മാനസികാരോഗ്യത്തെ ഗുരുതരമായി ബാധിച്ചുവെന്നും, രാഹുല് ഈശ്വറാണ് ഇതിന് പ്രധാനക്കാരനെന്നും ഫെയ്സ്ബുക്ക് പോസ്റ്റിലൂടെ ഹണി റോസ് വ്യക്തമാക്കി. രാഹുല് ഈശ്വറിനെ പോലുള്ളവരുടെ ഇത്തരം ഓര്ഗനൈസ്ഡ് ക്രൈം ഓപ്പറേഷന് കാരണം ഇത്തരം അവസ്ഥയില്പ്പെട്ട് പോകുന്ന സ്ത്രീകള് പരാതിയുമായി മുന്നോട്ടുവരാന് മടിക്കും. അത്തരം നടപടികള് ആണ് തുടര്ച്ചയായി രാഹുല് ഈശ്വര് എല്ലാ സ്ത്രീകളായ പരാതിക്കാരോടും കാണിക്കുന്നതെന്നും ഹണി റോസിന്റെ കുറിപ്പില് പറയുന്നു.
