തിരുവനന്തപുരം: തലസ്ഥാനത്തെ ബാലരാമപുരത്ത് രണ്ടുവയസ്സുകാരിയുടെ മരണത്തിൽ ദുരൂഹതയെന്ന് പൊലീസ്. കോട്ടുകാൽക്കോണം സ്വദേശികളായ ശ്രീതു-ശ്രീജിത്ത് ദമ്പതികളുടെ മകൾ ദേവേന്ദുവാണ് മരിച്ചത്. കുട്ടിയുടെ മരണം കൊലപാതകമാണെന്ന സംശയത്തിലാണ് പൊലീസ്.
സംഭവവുമായി ബന്ധപ്പെട്ട് കുട്ടിയുടെ അച്ഛൻ ശ്രീജിത്ത്, അമ്മ ശ്രീതു, അമ്മാവൻ ഹരികുമാർ എന്നിവരെ കസ്റ്റഡിയിലെടുത്ത് ചോദ്യം ചെയ്യുകയാണ്. പൊലീസ് സംഭവസ്ഥലമായ വീട് സീൽ ചെയ്തിരിക്കുകയാണ്.
ആദ്യ വിവരം അനുസരിച്ച് രക്ഷിതാക്കളോടൊപ്പം ഉറങ്ങിക്കിടന്ന കുട്ടിയെ കാണാനില്ലെന്ന് ആദ്യം മുത്തശ്ശി അറിയിച്ചു. തുടർന്നുള്ള തിരച്ചിലിൽ വീടിന് സമീപത്തെ ആള്മറയുള്ള കിണറ്റിൽ നിന്ന് കുട്ടിയുടെ മൃതദേഹം കണ്ടെത്തി. പുലർച്ചെയാണ് കുട്ടിയെ കാണാതായതെന്ന് പറയുന്നു.
പോലീസിന്റെ അന്വേഷണത്തിൽ കുടുംബാംഗങ്ങളുടെ മൊഴികളിൽ വൈരുധ്യമുണ്ട്. അമ്മ ശ്രീതു പറയുന്നതനുസരിച്ച് പുലർച്ചെ 5.15ഓടെ കുട്ടി കരയുന്ന ശബ്ദം കേട്ടു. എന്നാൽ അച്ഛൻ ശ്രീജിത്ത് കുഞ്ഞ് അമ്മയ്ക്കൊപ്പമായിരുന്നു എന്ന മൊഴി നൽകി.
കൂടാതെ, വീട്ടിലെ ചായ്പിൽ കയറുകൾ കുരുക്കിട്ട നിലയിൽ കണ്ടെത്തിയതും സംശയത്തിന് ഇടയാക്കുന്നു. കൂട്ടത്തോടെ ആത്മഹത്യയ്ക്ക് ശ്രമിച്ചിരുന്നോയെന്ന സംശയവും പൊലീസ് ഉയർത്തുന്നു. വീട്ടിലെ സിസിടിവി ദൃശ്യങ്ങൾ പരിശോധിച്ചപ്പോഴെല്ലാം, പുറത്തുനിന്ന് ആരും അകത്തുകടന്നതായി തെളിവുകളില്ലെന്ന് സ്ഥിരീകരിച്ചു.
കുട്ടിയെ കാണാതായതെന്ന് പറഞ്ഞ സമയത്ത് അമ്മാവൻ കിടന്നിരുന്ന മുറിയിൽ തീപിടുത്തമുണ്ടായിരുന്നുവെന്നും അതിന് ശേഷം കുഞ്ഞിനെ കാണാതായതായുമാണ് കുടുംബം പറഞ്ഞത്. അമ്മാവന്റെ മുറിയിൽ മണ്ണെണ്ണയുടെ ഗന്ധം പൊലീസ് കണ്ടെത്തിയിരുന്നു. ഫയർഫോഴ്സ് നടത്തിയ തിരച്ചിലിലാണ് കുഞ്ഞിന്റെ മൃതദേഹം കിണറ്റിൽ നിന്ന് കണ്ടെത്തിയത്.
സംഭവത്തിൽ ദുരൂഹതയുണ്ടെന്നും കൂടുതൽ അന്വേഷണം നടത്തേണ്ടതുണ്ടെന്നും എം.എൽ.എ എം. വിൻസെന്റ് പ്രതികരിച്ചു.
