കണ്ണൂര്: എഡിഎം നവീന്ബാബുവിന്റെ മരണത്തില് തുടരന്വേഷണം വേണമെന്ന കുടുംബത്തിന്റെ ആവശ്യത്തെ എതിര്ത്ത് പൊലീസ്. നവീന്ബാബുവിന്റെ ഭാര്യ മഞ്ജുഷ നല്കിയ ഹര്ജി തള്ളണമെന്നാവശ്യപ്പെട്ടു പൊലീസ് കോടതിയില് റിപ്പോര്ട്ട് സമര്പ്പിച്ചു.
ഉത്തരമേഖലാ ഐജിയുടെ ഉത്തരവനുസരിച്ചു പ്രത്യേക അന്വേഷണസംഘം രൂപീകരിച്ചു ഹൈക്കോടതിയുടെ നിര്ദേശം പാലിച്ചാണ് അന്വേഷണം പൂര്ത്തിയാക്കിയതെന്നും കുറ്റപത്രത്തിന്റെ കരട് തയാറാക്കി പരാതിക്കാരിയെ ബോധ്യപ്പെടുത്തിയ ശേഷമാണു കുറ്റപത്രം സമര്പ്പിച്ചതെന്നും റിപ്പോര്ട്ടില് പറയുന്നു. കേസ് വാദം കേള്ക്കാനായി ഫെബ്രുവരി 19 ലേക്കു മാറ്റി.
കേസില് പ്രത്യേക അന്വേഷണസംഘം കുറ്റപത്രം കോടതിയില് സമര്പ്പിച്ചതിന് പിന്നാലെയാണ് നവീന് ബാബുവിന്റെ കുടുംബം തുടരന്വേഷണം ആവശ്യപ്പെട്ട് സെഷന്സ് കോടതിയെ സമീപിച്ചത്. കേസില് സിസിടിവി ദൃശ്യങ്ങളും തെളിവുകളും കോടതിയില് സമര്പ്പിച്ചിട്ടുണ്ട്. എഡിഎമ്മിന്റെ ഭാര്യ ഉന്നയിക്കുന്ന ആരോപണങ്ങള് അടിസ്ഥാനമില്ലാത്തതാണെന്നും കണ്ണൂര് ടൗണ് സി ഐ തലശേരി അഡീ. സെഷന്സ് കോടതിയില് നല്കിയ റിപ്പോര്ട്ടില് പറയുന്നു.
പ്രത്യേക അന്വേഷണസംഘത്തിന്റെ തലവനായിരുന്ന രത്നകുമാറിന്റെ രാഷ്ട്രീയബന്ധം സിപിഎം നേതാവും മുന് ജില്ലാ പഞ്ചായത്ത് പ്രസിഡന്റുമായ പി.പി ദിവ്യക്കെതിരെയുള്ള കേസില് അന്വേഷണം അട്ടിമറിക്കാന് സാധ്യത വര്ധിപ്പിക്കുമെന്നാണ് പ്രധാനമായും ഹര്ജിയിലുണ്ടായിരുന്നത്. നേരത്തെ, സിബിഐ അന്വേഷണം വേണമെന്ന കുടുംബത്തിന്റെ ആവശ്യം സുപ്രിംകോടതി തള്ളിയിരുന്നു.
