ന്യൂഡൽഹി: രാജ്യത്തെ ആഭ്യന്തര വിമാനക്കമ്പനികളുടെ വിമാനങ്ങളിൽ ആവർത്തിച്ച് ഉണ്ടാകുന്ന സാങ്കേതിക തകരാറുകളിൽ എയർ ഇന്ത്യ ഗ്രൂപ്പ് ഒന്നാമതെന്ന് കേന്ദ്ര സർക്കാർ. പാർലമെന്റിൽ സമർപ്പിച്ച ഔദ്യോഗിക കണക്കുകൾ പ്രകാരം, പരിശോധനയ്ക്ക് വിധേയമാക്കിയ എയർ ഇന്ത്യ വിമാനങ്ങളിൽ പത്തിൽ ഏഴിലേറെയിലും തുടർച്ചയായ സാങ്കേതിക പ്രശ്നങ്ങൾ കണ്ടെത്തിയിട്ടുണ്ട്.
വ്യാഴാഴ്ച ലോക്സഭയിൽ വ്യോമയാന മന്ത്രാലയം നൽകിയ വിവരങ്ങൾ അനുസരിച്ച്, കഴിഞ്ഞ ഒരു വർഷത്തിനിടെ വിവിധ ഇന്ത്യൻ വിമാനക്കമ്പനികളിലായി മൊത്തം 377 വിമാനങ്ങളിൽ ആവർത്തിച്ച സാങ്കേതിക തകരാറുകൾ റിപ്പോർട്ട് ചെയ്തു. ഇതിൽ എയർ ഇന്ത്യയുടെയും എയർ ഇന്ത്യ എക്സ്പ്രസിന്റെയും പ്രകടനം ഏറെ ആശങ്കാജനകമാണെന്ന് കണക്കുകൾ വ്യക്തമാക്കുന്നു.
പരിശോധിച്ച എയർ ഇന്ത്യയുടെ 166 വിമാനങ്ങളിൽ 137 എണ്ണത്തിലും തകരാറുകൾ കണ്ടെത്തിയപ്പോൾ, എയർ ഇന്ത്യ എക്സ്പ്രസിന്റെ 101 വിമാനങ്ങളിൽ 54 എണ്ണത്തിലും സമാന പ്രശ്നങ്ങൾ റിപ്പോർട്ട് ചെയ്തു. എയർ ഇന്ത്യ ഗ്രൂപ്പിന്റെ മൊത്തം 267 വിമാനങ്ങളിൽ 191 എണ്ണവും — ഏകദേശം 72 ശതമാനം — ആവർത്തിച്ച തകരാറുകളുടെ പട്ടികയിൽ ഉൾപ്പെട്ടു.
ഇൻഡിഗോയുടെ 405 വിമാനങ്ങളിൽ 148 എണ്ണത്തിലും സാങ്കേതിക തകരാറുകൾ കണ്ടെത്തിയിട്ടുണ്ട്. സ്പൈസ് ജെറ്റിന്റെ 43 വിമാനങ്ങളിൽ 16 എണ്ണത്തിലും പ്രശ്നങ്ങൾ റിപ്പോർട്ട് ചെയ്തതായി കണക്കുകൾ പറയുന്നു.
വിമാന സുരക്ഷ ഉറപ്പാക്കുന്നതിനായി ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (DGCA) കർശന നടപടികൾ സ്വീകരിച്ചുവരികയാണെന്ന് വ്യോമയാന സഹമന്ത്രി മുരളീധർ മോഹോൾ പാർലമെന്റിനെ അറിയിച്ചു. കഴിഞ്ഞ വർഷം മാത്രം ഡിജിസിഎ 3,890 സർവൈലൻസ് ഇൻസ്പെക്ഷനുകളും 56 റെഗുലേറ്ററി ഓഡിറ്റുകളും നടത്തിയിട്ടുണ്ട്. സുരക്ഷാ മാനദണ്ഡങ്ങളിൽ വിട്ടുവീഴ്ച ചെയ്യുന്ന വിമാനക്കമ്പനികൾക്കെതിരെ ശക്തമായ നടപടി തുടരുമെന്നും കേന്ദ്ര സർക്കാർ വ്യക്തമാക്കി.
