ന്യൂഡൽഹി: ഡിജിറ്റൽ ലോകത്ത് തന്റെ സ്വാധീനം ശക്തിപ്പെടുത്തിക്കൊണ്ട് പ്രധാനമന്ത്രി നരേന്ദ്ര മോദിയുടെ യൂട്യൂബ് ചാനൽ 3 കോടി (30 മില്യൺ) സബ്സ്ക്രൈബേഴ്സ് എന്ന ചരിത്ര നേട്ടം സ്വന്തമാക്കി. ഇതോടെ യൂട്യൂബിൽ ഏറ്റവും കൂടുതൽ ആളുകൾ പിന്തുടരുന്ന ലോകനേതാവെന്ന റെക്കോർഡ് മോദിക്ക് സ്വന്തമായി. പട്ടികയിൽ രണ്ടാമതുള്ള മുൻ ബ്രസീൽ പ്രസിഡന്റ് ജെയർ ബോൾസോനാരോയുടെ സബ്സ്ക്രൈബർ എണ്ണം മോദിയുടെ നാലിലൊന്നിന് താഴെയാണ്. അമേരിക്കൻ പ്രസിഡന്റ് ഡൊണാൾഡ് ട്രംപിനേക്കാൾ ഏഴ് മടങ്ങ് കൂടുതൽ വരിക്കാരാണ് മോദിക്കുള്ളത്. ഇത് അദ്ദേഹത്തിന്റെ ആഗോള ഡിജിറ്റൽ സ്വാധീനത്തെ വ്യക്തമാക്കുന്നതാണ്.
ഇന്ത്യൻ രാഷ്ട്രീയ രംഗത്തും മോദിയുടെ ഡിജിറ്റൽ ആധിപത്യം വ്യക്തമാണ്. കോൺഗ്രസ് നേതാവ് രാഹുൽ ഗാന്ധിയേക്കാൾ മൂന്ന് മടങ്ങ് കൂടുതൽ സബ്സ്ക്രൈബേഴ്സാണ് മോദിയുടെ ചാനലിനുള്ളത്. കൂടാതെ ആം ആദ്മി പാർട്ടി, ഇന്ത്യൻ നാഷണൽ കോൺഗ്രസ് എന്നിവയുടെ ഔദ്യോഗിക ചാനലുകളേക്കാൾ നാലിരട്ടിയിലേറെയാണ് പ്രധാനമന്ത്രിയുടെ യൂട്യൂബ് ചാനലിലെ പിന്തുടർച്ച. ഇതോടൊപ്പം, ഒരാഴ്ച മുൻപ് ഇൻസ്റ്റാഗ്രാമിൽ 10 കോടി ഫോളോവേഴ്സ് എന്ന നേട്ടവും മോദി സ്വന്തമാക്കിയിരുന്നു. ലോക നേതാക്കളിൽ പലരെയും പിന്നിലാക്കി സോഷ്യൽ മീഡിയയിൽ മോദിയുടെ ശക്തമായ സാന്നിധ്യം വീണ്ടും തെളിഞ്ഞിരിക്കുകയാണ്.
