നെറ്റ്ഫ്ലിക്സ്, ഗൂഗിൾ, യൂട്യൂബ്, എയർ ഇന്ത്യ തുടങ്ങിയ സ്ഥാപനങ്ങളുമായുള്ള ടൂറിസം മന്ത്രാലയത്തിന്റെ സഹകരണം ഇന്ത്യയുടെ വിനോദസഞ്ചാര കേന്ദ്രങ്ങളെ ആഗോളതലത്തിൽ പ്രചരിപ്പിക്കുന്നതിൽ വലിയ നേട്ടമുണ്ടാക്കുമെന്ന് കേന്ദ്ര ടൂറിസം മന്ത്രി ഗജേന്ദ്ര സിങ് ഷെഖാവത്ത് പറഞ്ഞു.
ന്യൂഡൽഹിയിലെ നാഷണൽ ഗാലറി ഓഫ് മോഡേൺ ആർട്ടിൽ (എൻ.ജി.എം.എ) നെറ്റ്ഫ്ലിക്സിന്റെ ഇന്ത്യയിലെ 10-ാം വാർഷികത്തോടനുബന്ധിച്ച് നടന്ന പരിപാടിയിൽ സംസാരിക്കുകയായിരുന്നു അദ്ദേഹം.
ലോകത്തിന് മുന്നിൽ അവതരിപ്പിക്കാൻ ഇന്ത്യയ്ക്ക് സമ്പന്നമായ പൈതൃകവും സംസ്കാരവും പ്രകൃതി സൗന്ദര്യവും വൈവിധ്യമാർന്ന വിനോദസഞ്ചാര സാധ്യതകളും ഉണ്ടെന്ന് മന്ത്രി പറഞ്ഞു.നെറ്റ്ഫ്ലിക്സ് ഇന്ത്യയിലെ വിവിധ നിർമ്മാണങ്ങൾക്കായി രാജ്യത്തെ 100-ലധികം ലൊക്കേഷനുകളിൽ ചിത്രീകരണം നടത്തിയിട്ടുണ്ടെന്നും ഇതിലൂടെ ഇന്ത്യയുടെ വിനോദസഞ്ചാര സാധ്യതകളും സാംസ്കാരിക വൈവിധ്യവും ആഗോള പ്രേക്ഷകരിലേക്ക് എത്തിക്കാൻ കഴിഞ്ഞിട്ടുണ്ടെന്നും അദ്ദേഹം ചൂണ്ടിക്കാട്ടി.
പൊതു-സ്വകാര്യ പങ്കാളിത്തം കൂടുതൽ ശക്തിപ്പെടുത്തുന്നതിലൂടെ ഇന്ത്യയെ ലോകത്തിലെ പ്രധാന വിനോദസഞ്ചാര കേന്ദ്രങ്ങളിലൊന്നായി ഉയർത്തിക്കാട്ടാൻ കഴിയുമെന്നും ഷെഖാവത്ത് അഭിപ്രായപ്പെട്ടു.
