ഗുരുവായൂര് മണ്ഡലത്തില് ബിജെപി സ്ഥാനാര്ത്ഥി ബി ഗോപാലകൃഷ്ണന് നടത്തിയ വര്ഗീയ പരാമര്ശം വിവാദത്തിലേക്ക്. കഴിഞ്ഞ അമ്പത് വര്ഷങ്ങളായി ഗുരുവായൂര് മണ്ഡലത്തില് നിന്ന് ഒരു ഹിന്ദു എംഎല്എ പോലും വന്നിട്ടില്ല എന്ന ഗോപാലകൃഷ്ണൻ്റെ വര്ഗീയ പരാമര്ശമാണ് വിവാദമായത്.
ബിജെപി നേതാവിനെതിരെ നടപടി ആവശ്യപ്പെട്ട് ഭരണകക്ഷിയായ എല്ഡിഎഫും പ്രതിപക്ഷ പാര്ട്ടിയായ യുഡിഎഫും തെരഞ്ഞെടുപ്പ് കമ്മീഷനെ സമീപിച്ചു. പ്രചാരണ വീഡിയോയില് ഉള്ക്കൊള്ളുന്ന പ്രസ്താവന വര്ഗീയ അര്ത്ഥമുള്ളതാണെന്നും ഇത് തെരഞ്ഞെടുപ്പ് മാനദണ്ഡങ്ങളെ ലംഘിക്കുന്നതാണെന്നും ഇരുപാര്ട്ടികളും ആരോപിച്ചു.
എല്ഡിഎഫും യുഡിഎഫും ഇത്രയും കാലമായി ഒരു ഹിന്ദു സ്ഥാനാര്ത്ഥിയെ നിര്ത്തിയിട്ടില്ലെന്നാണ് ഗോപാലകൃഷ്ണൻ്റെ ആരോപണം. പ്രതിപക്ഷ പാര്ട്ടികള് ഗോപാലകൃഷ്ണൻ്റെ പ്രസ്താവനകളെ ശക്തമായി വിമര്ശിച്ചു, ഇത്തരം പ്രസ്താവനകള് സംസ്ഥാനത്തെ മത ഐക്യത്തെ തകര്ക്കും.
കോണ്ഗ്രസിൻ്റെ വിദ്യാര്ത്ഥി മുന്നണിയായ കേരള സ്റ്റുഡൻ്റ്സ് യൂണിയന് ഈ വിഷയത്തില് നിയമപരമായ നടപടികളിലേക്കും നീങ്ങിയിട്ടുണ്ട്. ബിജെപി സ്ഥാനാര്ത്ഥിക്കെതിരെ കര്ശന നടപടിയെടുക്കണമെന്നാവശ്യപ്പെട്ട് സംഘടന ഹൈക്കോടതിയില് ഹര്ജി ഫയല് ചെയ്യുകയും വര്ഗീയ പരാമര്ശം നടത്തിയതിന് പോലീസില് പരാതി നല്കുകയും ചെയ്തിട്ടുണ്ട്.
അതെസമയം പറഞ്ഞതില് ഉറച്ചു നില്ക്കുന്നുവെന്ന് അഡ്വ. ബി ഗോപാലകൃഷ്ണന് അറിയിച്ചു.വിവാദ പരാമര്ശമല്ല നടത്തിയതെന്നും മറിച്ച് യാഥാര്ത്ഥ്യമാണ് പറഞ്ഞതെന്നും ഗോപാലകൃഷ്ണന് പറഞ്ഞു. ഞാന് പറഞ്ഞത് നൂറ് ശതമാനവും യാഥാര്ത്ഥ്യമാണ്. ആ യാഥാര്ത്ഥ്യത്തില് ഉറച്ചു നില്ക്കുന്നു. ഒരു മാറ്റവുമില്ല. ഹിന്ദുക്കളുടെ കാര്യം പറഞ്ഞാല് വിവാദം. ചാവക്കാട് മുസ്ലിം മത പണ്ഡിതൻ്റെ യാത്രയില് കോണ്ഗ്രസും സിപിഎമ്മും മത്സരിച്ച് പങ്കെടുത്തു. പക്ഷേ, നിള തീരത്ത് മഹാകുംഭമേള ഉണ്ടായപ്പോള് ഇവരൊന്നും തിരിഞ്ഞു നോക്കിയില്ല. വിവാദമാക്കുന്നവര്ക്ക് വിവാദമാക്കാം ഗോപാലകൃഷ്ണന് പ്രതികരിച്ചു.
