സംസ്ഥാനത്ത് ഞായറാഴ്ചയും തിങ്കളാഴ്ചയും (ഏപ്രില് 26, 27) കടുത്ത ചൂട് അനുഭവപ്പെടുമെന്ന് കേന്ദ്ര കാലാവസ്ഥാ നിരീക്ഷണ വകുപ്പ് അറിയിച്ചു. സാധാരണ താപനിലയെക്കാള് 3 മുതല് 4 ഡിഗ്രി സെല്ഷ്യസ് വരെ ഉയര്ന്നേക്കാമെന്നാണ് മുന്നറിയിപ്പ്.
പാലക്കാട് ജില്ലയില് 40°C വരെയും, കൊല്ലം ജില്ലയില് 39°C വരെയും, പത്തനംതിട്ട, കോട്ടയം, തൃശൂര്, കോഴിക്കോട് ജില്ലകളില് 38°C വരെയും താപനില ഉയരാന് സാധ്യതയുണ്ട്. ആലപ്പുഴ, എറണാകുളം, മലപ്പുറം, കണ്ണൂര്, കാസര്ഗോഡ് ജില്ലകളില് 37°C വരെയും, തിരുവനന്തപുരം ജില്ലയില് 36°C വരെയും താപനില ഉയര്ന്നേക്കും.
ഇതിനിടെ ഈ ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. ഉയര്ന്ന താപനിലയും ഈര്പ്പമുള്ള വായുവും കാരണം, മലയോര മേഖലകളൊഴികെ, കടുത്ത ചൂടും അസ്വസ്ഥതയും അനുഭവപ്പെടാന് സാധ്യതയുണ്ടെന്ന് അധികൃതര് അറിയിച്ചു.
ചൂട് മൂലമുള്ള സൂര്യാഘാതം, സൂര്യതാപം, നിര്ജലീകരണം എന്നിവ ഒഴിവാക്കാന് ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിര്ദേശിച്ചു. വെള്ളം ധാരാളമായി കുടിക്കാനും നേരിട്ടുള്ള വെയില് ഒഴിവാക്കാനും പൊതുജനങ്ങള്ക്ക് നിര്ദേശം നല്കിയിട്ടുണ്ട്.
