വിദേശകാര്യമന്ത്രി എസ് ജയശങ്കറും അമേരിക്കൻ വിദേശകാര്യ സെക്രട്ടറി മാർക്കോ റൂബിയോയും തമ്മിൽ നടന്ന നിർണായക ചർച്ചയിൽ ഇന്ത്യ-അമേരിക്ക ബന്ധം കൂടുതൽ ശക്തിപ്പെടുത്താൻ ധാരണയായി. വ്യാപാരം, വിസ നയം, ഊർജ സുരക്ഷ, അതിർത്തി ഭീകരവാദം, പശ്ചിമേഷ്യൻ സംഘർഷം എന്നിവ ഉൾപ്പെടെയുള്ള വിഷയങ്ങൾ ചർച്ചയായി.
നാലു ദിവസത്തെ ഇന്ത്യാ സന്ദർശനത്തിനെത്തിയ റൂബിയോ, ഇന്ത്യയെ അമേരിക്കയുടെ ഏറ്റവും പ്രധാന തന്ത്രപ്രധാന പങ്കാളികളിലൊന്നായി വിശേഷിപ്പിച്ചു. ഇരു രാജ്യങ്ങളുടെയും ബന്ധം കൂടുതൽ ശക്തമാകുമെന്ന് അദ്ദേഹം വ്യക്തമാക്കി.
സംവാദം, നയതന്ത്രം, അന്താരാഷ്ട്ര നിയമങ്ങൾക്ക് ബഹുമാനം, സമുദ്രവ്യാപാര സ്വാതന്ത്ര്യം, വിപണികളെയും വിഭവങ്ങളെയും ആയുധമാക്കുന്നതിനെതിരായ നിലപാട് എന്നിവ ഉൾപ്പെട്ട അഞ്ചു കാര്യങ്ങളാണ് ഇന്ത്യയുടെ വിദേശനയ സമീപനമായി ജയശങ്കർ മുന്നോട്ടുവെച്ചത്.
പശ്ചിമേഷ്യൻ പ്രതിസന്ധി ഇന്ത്യയുടെ ഊർജ സുരക്ഷയെ ബാധിച്ചിട്ടുണ്ടെന്നും ഊർജവിതരണ ഉറവിടങ്ങൾ വൈവിധ്യമാർന്നതാകേണ്ടത് അനിവാര്യമാണെന്നും ജയശങ്കർ പറഞ്ഞു. ഹോർമുസ് കടലിടുക്കിലൂടെ സുരക്ഷിതമായ സമുദ്രവ്യാപാരം ഉറപ്പാക്കേണ്ടതിൻ്റെ പ്രാധാന്യവും അദ്ദേഹം ചൂണ്ടിക്കാട്ടി.
വിസ, കുടിയേറ്റ നയങ്ങളിൽ അമേരിക്ക വരുത്തുന്ന മാറ്റങ്ങളെ കുറിച്ചുള്ള ഇന്ത്യയുടെ ആശങ്കകളും ജയശങ്കർ റൂബിയോയോട് അറിയിച്ചു. പുതിയ സംവിധാനത്തിലേക്ക് മാറുന്ന ഘട്ടത്തിൽ ചില ബുദ്ധിമുട്ടുകൾ ഉണ്ടാകാമെങ്കിലും അത് ഇന്ത്യയെ ലക്ഷ്യമിട്ടുള്ളതല്ലെന്ന് റൂബിയോ പ്രതികരിച്ചു.
പ്രതിരോധം, നിർണായക ധാതുക്കൾ, ഹൈടെക് മേഖല, കൃത്രിമ ബുദ്ധി, ഭീകരവിരുദ്ധ സഹകരണം തുടങ്ങിയ മേഖലകളിൽ സഹകരണം ശക്തമാക്കാൻ ഇരു രാജ്യങ്ങളും ധാരണയായി. ഇന്ത്യ-അമേരിക്ക വ്യാപാര കരാർ ഉടൻ യാഥാർഥ്യമാകുമെന്നും റൂബിയോ പ്രത്യാശ പ്രകടിപ്പിച്ചു.
