പെട്രോൾ, ഡീസൽ, ഏവിയേഷൻ ടർബൈൻ ഫ്യൂവൽ (എടിഎഫ്) എന്നിവയുടെ കയറ്റുമതിക്കുള്ള വിൻഡ്ഫോൾ നികുതി കേന്ദ്ര സർക്കാർ കുറച്ചു. പുതുക്കിയ നികുതി നിരക്കുകൾ ജൂൺ 1 മുതൽ പ്രാബല്യത്തിൽ വരും.
ധനമന്ത്രാലയം പുറത്തിറക്കിയ വിജ്ഞാപനപ്രകാരം, പെട്രോൾ കയറ്റുമതിക്കുള്ള നികുതി ലിറ്ററിന് 1.50 രൂപ ആയി കുറച്ചു. ഡീസലിനുള്ള നികുതി ലിറ്ററിന് 13.50 രൂപയായും എടിഎഫിനുള്ള നികുതി ലിറ്ററിന് 9.50 രൂപയായും കുറച്ചിട്ടുണ്ട്.
പെട്രോളിൻ്റെയും ഡീസലിൻ്റെയും കയറ്റുമതിക്ക് ഈടാക്കിയിരുന്ന റോഡ്-അടിസ്ഥാന സൗകര്യ സെസ് പൂർണമായി ഒഴിവാക്കിയെന്ന് കേന്ദ്ര സർക്കാർ അറിയിച്ചു.
അതേസമയം, ആഭ്യന്തര ഉപഭോഗത്തിനായി വിപണിയിലെത്തിക്കുന്ന പെട്രോളിനും ഡീസലിനുമുള്ള നിലവിലെ നികുതി നിരക്കുകളിൽ മാറ്റമില്ലെന്നും ധനമന്ത്രാലയത്തിൻ്റെ വിജ്ഞാപനത്തിൽ വ്യക്തമാക്കുന്നു.
ഇന്ധന കയറ്റുമതിക്കാർക്ക് ആശ്വാസം നൽകുന്നതോടൊപ്പം ആഭ്യന്തര വിപണിയിലെ നികുതി ഘടനയിൽ മാറ്റം വരുത്താതെയാണ് കേന്ദ്രത്തിൻ്റെ പുതിയ തീരുമാനം.
