അയോധ്യ: ഉത്തർപ്രദേശ് മുഖ്യമന്ത്രി യോഗി ആദിത്യനാഥ് വെള്ളിയാഴ്ച അയോധ്യയിൽ രാമായണ വാക്സ് മ്യൂസിയവും സോണൽ ഓഫീസ് കെട്ടിടവും ഉദ്ഘാടനം ചെയ്തു. 290 കോടിയിലധികം രൂപ ചെലവിൽ നടപ്പാക്കുന്ന 245 വികസന പദ്ധതികളുടെ ഭാഗമായാണ് ഈ പദ്ധതികൾ ഉദ്ഘാടനം ചെയ്ത് ശിലാസ്ഥാപനം നടത്തിയത്.
അയോധ്യ ഇനി അവഗണിക്കപ്പെട്ടതോ അവഹേളിക്കപ്പെട്ടതോ ആയ നഗരമാകില്ലെന്ന് പരിപാടിയിൽ സംസാരിക്കവേ യോഗി ആദിത്യനാഥ് പറഞ്ഞു. കഴിഞ്ഞ വർഷങ്ങളിലായി നഗരം സമഗ്രമായ പരിവർത്തനത്തിന് സാക്ഷ്യം വഹിച്ചിട്ടുണ്ടെന്നും അദ്ദേഹം വ്യക്തമാക്കി.
ഭഗവാൻ ശ്രീരാമ രാജ്യത്തിൻ്റെ മഹത്വവും പാരമ്പര്യവും ഇന്നും അയോധ്യയിൽ പ്രതിഫലിക്കുന്നുണ്ടെന്ന് അദ്ദേഹം പറഞ്ഞു. വികസന പ്രവർത്തനങ്ങളും അടിസ്ഥാന സൗകര്യ വികസനവും നഗരത്തിൻ ്റെ മുഖച്ഛായ മാറ്റിയതായും അദ്ദേഹം കൂട്ടിച്ചേർത്തു.
ആത്മീയ, സാംസ്കാരിക, വിനോദസഞ്ചാര കേന്ദ്രമെന്ന നിലയിൽ അയോധ്യയെ കൂടുതൽ ശക്തിപ്പെടുത്തുകയും ജനങ്ങൾക്ക് മെച്ചപ്പെട്ട അടിസ്ഥാന സൗകര്യങ്ങളും സേവനങ്ങളും ഉറപ്പാക്കുകയും ചെയ്യുക എന്ന ലക്ഷ്യത്തോടെയാണ് വിവിധ വികസന പദ്ധതികൾ നടപ്പാക്കുന്നതെന്ന് മുഖ്യമന്ത്രി വ്യക്തമാക്കി.
