റാഞ്ചി: ജാർഖണ്ഡിലെ റിക്രൂട്ട്മെൻ്റ് പരീക്ഷകളിലെ ക്രമക്കേടുകൾ ആരോപിച്ച് സമരം ചെയ്യുന്ന വിദ്യാർത്ഥികൾ സ്വാതന്ത്ര്യദിനത്തിൽ റാഞ്ചിയിൽ ‘തിരംഗ യാത്ര’ നടത്തി. മുഖ്യമന്ത്രി ഹേമന്ത് സോറൻ്റെ രാജി ആവശ്യപ്പെട്ട് ഓഗസ്റ്റ് 20ന് മുഖ്യമന്ത്രിയുടെ വസതി വളയുമെന്നും സമരക്കാർ പ്രഖ്യാപിച്ചു.
ഞായറാഴ്ച സംസ്ഥാനത്തെ 24 ജില്ലകളിലും മുഖ്യമന്ത്രി ഹേമന്ത് സോറൻ്റേയും കോൺഗ്രസ് നേതാവ് രാഹുൽ ഗാന്ധിയുടെയും കോലം കത്തിക്കുമെന്നും പ്രതിഷേധക്കാർ അറിയിച്ചു.
റിക്രൂട്ട്മെൻ്റ് പരീക്ഷാ സംവിധാനത്തിൽ തങ്ങളുടെ ആവശ്യങ്ങൾ പരിഹരിക്കുന്നതിന് ഭരണകക്ഷിയായ ജെഎംഎം-കോൺഗ്രസ് സഖ്യം കൃത്യമായ നടപടികൾ സ്വീകരിക്കുന്നില്ലെന്നും സമരക്കാർ ആരോപിച്ചു.
സമരം 22-ാം ദിവസത്തിലേക്ക് കടന്ന സാഹചര്യത്തിലാണ് പുതിയ പ്രഖ്യാപനങ്ങൾ ഉണ്ടായിരിക്കുന്നത്. സ്വാതന്ത്ര്യദിനത്തോടനുബന്ധിച്ച് റാഞ്ചിയിൽ നടന്ന തിരംഗ യാത്രയിൽ ആയിരക്കണക്കിന് വിദ്യാർത്ഥികളും ഉദ്യോഗാർത്ഥികളും പങ്കെടുത്തു. റിക്രൂട്ട്മെൻ്റ് പരീക്ഷാ സംവിധാനത്തിൽ കൂടുതൽ സുതാര്യതയും പരിഷ്കാരങ്ങളും വേണമെന്നാണ് ഇവരുടെ പ്രധാന ആവശ്യം.
നിരാഹാര സമരം നടത്തുന്ന വീൽചെയറിലുള്ള രണ്ട് പ്രതിഷേധക്കാരും തിരംഗ യാത്രയിൽ പങ്കെടുത്തു.
പരീക്ഷകളിലെ ക്രമക്കേടുകളുമായി ബന്ധപ്പെട്ട പരാതികളിലും സുതാര്യത ആവശ്യപ്പെട്ടുള്ള തങ്ങളുടെ ആവശ്യങ്ങളിലും പരിഹാരം ഉണ്ടാകുന്നതുവരെ സമരം തുടരുമെന്ന് പ്രതിഷേധക്കാർ വ്യക്തമാക്കി.
