റഷ്യ-ഉക്രെയ്ൻ സംഘർഷത്തിന് എത്രയും വേഗം പരിഹാരം കാണണമെന്ന് ആവശ്യപ്പെട്ട് പ്രധാനമന്ത്രി നരേന്ദ്ര മോദി. “അനന്തമായ യുദ്ധത്തിൽ നിന്ന് യുദ്ധം അവസാനിപ്പിക്കുന്നതിലേക്ക് നീങ്ങണം” എന്ന് റഷ്യൻ പ്രസിഡന്റ് വ്ളാദിമിർ പുടിനോട് മോദി പറഞ്ഞു.
സംഘർഷത്തിന് സമാധാനപരമായ പരിഹാരം കണ്ടെത്തുക മനുഷ്യരാശിയുടെ പൊതുവായ മുൻഗണനയാണെന്നും അദ്ദേഹം വ്യക്തമാക്കി. കിർഗിസ്ഥാന്റെ തലസ്ഥാനമായ ബിഷ്കെക്കിൽ നടക്കുന്ന ഷാങ്ഹായ് സഹകരണ സംഘടന (SCO) ഉച്ചകോടിയുടെ ഭാഗമായി പുടിനുമായി നടത്തിയ കൂടിക്കാഴ്ചയിലാണ് മോദി നിലപാട് വ്യക്തമാക്കിയത്.
യുദ്ധം തുടരുന്ന ഓരോ ദിവസവും മനുഷ്യരാശിയെ പിന്നോട്ടടിപ്പിക്കുകയാണെന്ന് മോദി പറഞ്ഞു. മഹാത്മാഗാന്ധിയുടെയും ഗൗതമ ബുദ്ധന്റെയും നാടായ ഇന്ത്യ സമാധാനത്തിനായുള്ള എല്ലാ ശ്രമങ്ങളെയും പിന്തുണയ്ക്കുന്നുവെന്നും തുടർന്നും അതിനായി പ്രവർത്തിക്കുമെന്നും മോദി വ്യക്തമാക്കി.
ഇരു നേതാക്കളും വ്യാപാരം, നിക്ഷേപം, ഊർജ സുരക്ഷ, വളം വിതരണം തുടങ്ങിയ മേഖലകളിലെ ഉഭയകക്ഷി സഹകരണവും വിശദമായി ചർച്ച ചെയ്തു.
