അഹമ്മദാബാദ്: ഒളിമ്പിക്സ്, കോമൺവെൽത്ത് ഗെയിംസ് തുടങ്ങിയ പ്രധാന അന്താരാഷ്ട്ര കായിക മത്സരങ്ങളെ ലക്ഷ്യമിട്ട് കായിക മേഖലയുടെ സമഗ്ര വികസനം ശക്തിപ്പെടുത്തുന്നതിലൂടെ ഇന്ത്യ പ്രമുഖ ആഗോള കായിക കേന്ദ്രമായി മാറുമെന്ന് കേന്ദ്ര ആഭ്യന്തര, സഹകരണ മന്ത്രി അമിത് ഷാ പറഞ്ഞു.
അഹമ്മദാബാദിൽ സെപ്റ്റംബർ 5 മുതൽ 9 വരെ നടക്കുന്ന വേൾഡ് ആർച്ചറി പാരാ സീരീസിൻ്റെ ഉദ്ഘാടന ചടങ്ങിൽ ഓൺലൈനായി സംസാരിക്കുകയായിരുന്നു അദ്ദേഹം.
കായിക രംഗത്തെ പരിക്കുകൾ സംബന്ധിച്ച മെഡിക്കൽ ശാസ്ത്രത്തിലും സമീപഭാവിയിൽ ഇന്ത്യ ആഗോള തലത്തിൽ മുന്നിലെത്തുമെന്നും അമിത് ഷാ പറഞ്ഞു.
രാജ്യത്തിൻ്റെ വിവിധ ഭാഗങ്ങളിൽ വികസിപ്പിച്ചുകൊണ്ടിരിക്കുന്ന അത്യാധുനിക പരിശീലന, കോച്ചിംഗ് സൗകര്യങ്ങൾ ലോകത്തിൻ്റെ വിവിധ ഭാഗങ്ങളിൽ നിന്നുള്ള കായികതാരങ്ങൾക്ക് പരിശീലനം നൽകുന്ന പ്രധാന കേന്ദ്രമായി ഇന്ത്യയെ മാറ്റാൻ സഹായിക്കുമെന്നും അദ്ദേഹം വ്യക്തമാക്കി.
കായിക അടിസ്ഥാന സൗകര്യങ്ങൾ ശക്തിപ്പെടുത്തുന്നതിനും സമഗ്രമായ കായിക ആവാസവ്യവസ്ഥ രൂപപ്പെടുത്തുന്നതിനുമുള്ള നടപടികൾ ഇന്ത്യയുടെ ആഗോള കായിക സാന്നിധ്യം കൂടുതൽ ശക്തിപ്പെടുത്തുമെന്നും അമിത് ഷാ അറിയിച്ചു.
