ഗുവാഹത്തി: അസമിലെ ശ്രീഭൂമി ജില്ലയിൽ നടത്തിയ രണ്ട് വ്യത്യസ്ത പരിശോധനകളിൽ 2 കോടി രൂപയോളം വിലവരുന്ന നിരോധിത യാബ ഗുളികകൾ പിടികൂടി. സംഭവത്തിൽ നാല് പേരെ പൊലീസ് അറസ്റ്റ് ചെയ്തുവെന്ന് മുഖ്യമന്ത്രി ഹിമന്ത ബിശ്വ ശർമ അറിയിച്ചു.
20,000 യാബ ഗുളികകളാണ് പൊലീസ് പിടിച്ചെടുത്തത്. തായ് ഭാഷയിൽ ‘ക്രേസി മെഡിസിൻ’ എന്നറിയപ്പെടുന്ന യാബ, മെത്താംഫെറ്റമിനും കഫീനും അടങ്ങിയ ലഹരി പദാർത്ഥമാണ്.
ഇന്ത്യയിൽ യാബ ഗുളികകൾ കൈവശംവെക്കുന്നതും കടത്തുന്നതും നിയമവിരുദ്ധമാണ്. പിടിയിലായവരിൽ നിന്ന് ലഭിച്ച വിവരങ്ങളുടെ അടിസ്ഥാനത്തിൽ ലഹരിമരുന്നിൻ്റെ ഉറവിടവും വിതരണ ശൃംഖലയുമായി ബന്ധപ്പെട്ട കൂടുതൽ വിവരങ്ങളും കണ്ടെത്തുന്നതിനുള്ള അന്വേഷണം പുരോഗമിക്കുകയാണ്.
