ഡെറാഡൂൺ: 2026ലെ തീർത്ഥാടന സീസണിൽ ഏപ്രിൽ മുതൽ ഓഗസ്റ്റ് വരെ കേദാർനാഥ് ധാമിൽ ശേഖരിച്ചത് 50.30 മെട്രിക് ടൺ മാലിന്യം. കഴിഞ്ഞ മൂന്ന് വർഷങ്ങളിലെ ഓരോ തീർത്ഥാടന സീസണിലും ആകെ രേഖപ്പെടുത്തിയ മാലിന്യത്തേക്കാൾ കൂടുതലാണിത്.
നോയിഡ സ്വദേശിയും ആർടിഐ ആക്റ്റീവിസ്റ്റുമായ അമിത് ഗുപ്ത നൽകിയ വിവരാവകാശ അപേക്ഷയ്ക്ക് മറുപടിയായാണ് കേദാർനാഥ് നഗർ പഞ്ചായത്തിൽ നിന്ന് കണക്കുകൾ ലഭിച്ചത്.
പഞ്ചായത്തിന്റെ കണക്കുകൾ പ്രകാരം 2023ൽ കേദാർനാഥിൽ 32.58 മെട്രിക് ടൺ, 2024ൽ 26.10 മെട്രിക് ടൺ, 2025ൽ 21.40 മെട്രിക് ടൺ മാലിന്യമാണ് ഉണ്ടായത്.
എന്നാൽ 2026ലെ ആദ്യ അഞ്ച് മാസങ്ങളിൽ മാത്രം 50.30 മെട്രിക് ടൺ മാലിന്യം രേഖപ്പെടുത്തിയിട്ടുണ്ട്. കഴിഞ്ഞ മൂന്ന് വർഷങ്ങളിലേതിനേക്കാളും വലിയ വർധനയാണ് ഈ വർഷം ഉണ്ടായിരിക്കുന്നത്.
തീർത്ഥാടകരുടെ എണ്ണം ഉയരുന്നതിനൊപ്പം ഉയർന്നുവരുന്ന മാലിന്യത്തിന്റെ അളവ് കേദാർനാഥ് പോലുള്ള ഉയർന്ന പ്രദേശങ്ങളിലെ മാലിന്യസംസ്കരണ സംവിധാനങ്ങൾക്കുള്ള വെല്ലുവിളി വർധിപ്പിക്കുന്നതായി കണക്കുകൾ വ്യക്തമാക്കുന്നു.
