കോട്ടയം: കൈക്കൂലി വാങ്ങിയെന്ന കേസിൽ സസ്പെൻഷനിലായ വൈക്കം പൊലീസ് സ്റ്റേഷനിലെ സർക്കിൾ ഇൻസ്പെക്ടർ അറസ്റ്റിൽ. ഇടുക്കി മുണ്ടക്കയം സ്വദേശി ഷമീർ ഖാൻ പി.എ (52)യെയാണ് വിജിലൻസ് ആൻഡ് ആൻ്റി കറപ്ഷൻ ബ്യൂറോ (വിഎസിബി) ഇന്ന് അറസ്റ്റ് ചെയ്തത്.
അസം സ്വദേശിയുടെ പേരിൽ ആരംഭിച്ച ബാങ്ക് അക്കൗണ്ട് വഴി കൈക്കൂലി സ്വീകരിച്ചെന്നാണ് ഉദ്യോഗസ്ഥനെതിരായ ആരോപണം. മണൽ ഖനന മേഖലയിലെ നടത്തിപ്പുകാരിൽ നിന്നും, ടിപ്പർ ലോറി ഉടമകളിൽ നിന്നുമായി യുപിഐ ഇടപാടുകളിലൂടെ 2.27 ലക്ഷം രൂപ കൈപ്പറ്റിയെന്നാണ് വിജിലൻസിൻ്റെ കണ്ടെത്തൽ. 2026 സെപ്റ്റംബർ അഞ്ചിനും ഒക്ടോബർ 16നും ഇടയിലായിരുന്നു ഇടപാടുകൾ.
അസം സ്വദേശിയുടെ പേരിലാണ് ബാങ്ക് അക്കൗണ്ട് ആരംഭിച്ചത്. എന്നാൽ മലയാളിയുടെ പേരിൽ രജിസ്റ്റർ ചെയ്ത മൊബൈൽ നമ്പർ ഇതുമായി ബന്ധിപ്പിച്ചിരുന്നുവെന്ന് വിജിലൻസ് അറിയിച്ചു.
ആരോപണത്തെ തുടർന്ന് നേരത്തെ ഉദ്യോഗസ്ഥനെ സസ്പെൻഡ് ചെയ്തിരുന്നു. കേസിൽ കൂടുതൽ അന്വേഷണം നടന്നുവരികയാണെന്ന് വിജിലൻസ് വ്യക്തമാക്കി.
