കൊച്ചി: ചില പ്രത്യേക മേഖലകളിൽ മത്സ്യങ്ങളിൽ പരാദജീവികളെ കണ്ടെത്തിയെന്ന റിപ്പോർട്ടുകളുടെ അടിസ്ഥാനത്തിൽ ട്യൂണ ഉൾപ്പെടെയുള്ള മത്സ്യങ്ങൾ ഒഴിവാക്കേണ്ടതില്ലെന്ന് ഐസിഎആർ-സെൻട്രൽ മറൈൻ ഫിഷറീസ് റിസർച്ച് ഇൻസ്റ്റിറ്റ്യൂട്ട് (ICAR-CMFRI) വ്യക്തമാക്കി.
ബ്രസീലിന് സമീപമുള്ള അറ്റ്ലാന്റിക് സമുദ്രത്തിൽ നിന്നുള്ള സ്കിപ്പ്ജാക്ക് ട്യൂണയിൽ പരാദജീവികളെ കണ്ടെത്തിയതുമായി ബന്ധപ്പെട്ട റിപ്പോർട്ടുകളെ തുടർന്നാണ് വിശദീകരണം. പരാദജീവികളുടെ സാന്നിധ്യം മത്സ്യത്തിന്റെ ആവാസമേഖലയും പാരിസ്ഥിതിക സാഹചര്യങ്ങളും അനുസരിച്ച് വ്യത്യാസപ്പെടാമെന്ന് സിഎംഎഫ്ആർഐ അറിയിച്ചു.
ഇന്ത്യൻ തീരങ്ങളിൽ പരിശോധിച്ച ട്യൂണ ഉൾപ്പെടെയുള്ള മത്സ്യങ്ങളിൽ ഹാനികരമായ പരാദജീവി ബാധയുടെ ബാഹ്യലക്ഷണങ്ങൾ കണ്ടെത്തിയിട്ടില്ലെന്നും സ്ഥാപനം വ്യക്തമാക്കി. ഒരു പ്രദേശത്തെ കണ്ടെത്തലുകൾ ഇന്ത്യൻ ജലാശയങ്ങളിലെ മത്സ്യങ്ങളിലേക്ക് പൊതുവായി ബാധകമാക്കാനാകില്ലെന്നും അറിയിച്ചു.
മത്സ്യം വൃത്തിയാക്കുമ്പോൾ ആന്തരിക അവയവങ്ങൾ നീക്കം ചെയ്യുകയും നന്നായി വേവിക്കുകയും ചെയ്യുന്നത് ഭക്ഷ്യസുരക്ഷ ഉറപ്പാക്കാൻ സഹായിക്കുമെന്നും സിഎംഎഫ്ആർഐ നിർദേശിച്ചു.
