ന്യൂഡൽഹി: 2026 ഏഷ്യൻ ഗെയിംസിൽ മെഡൽ നേട്ടം സ്വന്തമാക്കിയ ഇന്ത്യൻ താരങ്ങളെയും ടീമുകളെയും പ്രധാനമന്ത്രി നരേന്ദ്ര മോദി അഭിനന്ദിച്ചു. ഗുസ്തി താരം ദീപക് പുനിയ, അമൻ സെഹ്രാവത്, ഗോൾഫ് താരം പ്രണവി ശരത് ഉർസ്, അമ്പെയ്ത്ത് താരം കുംകും അനിൽ മോഹോദ് എന്നിവരെയാണ് പ്രധാനമന്ത്രി അഭിനന്ദിച്ചത്. ഏഷ്യൻ ഗെയിംസിൽ സ്വർണം നിലനിർത്തിയ ഇന്ത്യൻ പുരുഷ ക്രിക്കറ്റ് ടീമിനും അദ്ദേഹം ആശംസകൾ നേർന്നു.
പുരുഷന്മാരുടെ 97 കിലോഗ്രാം ഫ്രീസ്റ്റൈൽ ഗുസ്തിയിൽ വെങ്കല മെഡൽ നേടിയ ദീപക് പുനിയയെ പ്രധാനമന്ത്രി അഭിനന്ദിച്ചു. കടുത്ത പോരാട്ടത്തിനൊടുവിലാണ് ദീപക് വെങ്കലം സ്വന്തമാക്കിയത്. ആറ് പതിറ്റാണ്ടിന് ശേഷമാണ് ഈ ഇനത്തിൽ ഇന്ത്യ വീണ്ടും ഏഷ്യൻ ഗെയിംസ് പോഡിയത്തിലെത്തിയെന്നും പ്രധാനമന്ത്രി പറഞ്ഞു.
പുരുഷന്മാരുടെ 57 കിലോഗ്രാം ഫ്രീസ്റ്റൈൽ ഗുസ്തിയിൽ ഇന്ത്യയുടെ ആദ്യ ഏഷ്യൻ ഗെയിംസ് സ്വർണം നേടിയ അമൻ സെഹ്രാവതിനെയും മോദി അഭിനന്ദിച്ചു. കഴിഞ്ഞ ഏഷ്യൻ ഗെയിംസിൽ വെങ്കലം നേടിയ അമൻ ഇത്തവണ സ്വർണത്തിലേക്ക് ഉയർന്നത് മികച്ച ആത്മവിശ്വാസത്തിന്റെയും അർപ്പണത്തിൻ്റേയും തെളിവാണെന്ന് പ്രധാനമന്ത്രി പറഞ്ഞു.
ഏഷ്യൻ ഗെയിംസിൽ പുരുഷ ക്രിക്കറ്റിൽ സ്വർണം നിലനിർത്തിയ ഇന്ത്യൻ ടീമിനും പ്രധാനമന്ത്രി അഭിനന്ദനം അറിയിച്ചു. രാജ്യത്തിന് ഏറെ സന്തോഷം നൽകുന്ന നേട്ടമാണിതെന്നും ടീമിലെ അംഗങ്ങൾക്ക് ഭാവിയിലെ മത്സരങ്ങളിലും ആശംസകൾ നേരുന്നതായും അദ്ദേഹം പറഞ്ഞു.
വനിതകളുടെ വ്യക്തിഗത ഗോൾഫിൽ ഏഷ്യൻ ഗെയിംസ് ചരിത്രത്തിലെ ഇന്ത്യയുടെ ആദ്യ സ്വർണം നേടിയ പ്രണവി ശരത് ഉർസിനെയും പ്രധാനമന്ത്രി അഭിനന്ദിച്ചു. താരത്തിന്റെ മികച്ച പ്രകടനം രാജ്യത്തിന് ഏറെക്കാലം ഓർത്തിരിക്കാവുന്ന കായിക നിമിഷം സമ്മാനിച്ചെന്നും ഈ വിജയം കൂടുതൽ യുവാക്കളെ ഗോൾഫിലേക്ക് ആകർഷിക്കുമെന്ന് പ്രതീക്ഷിക്കുന്നതായും മോദി പറഞ്ഞു.
2026 ഏഷ്യൻ ഗെയിംസിൽ റികർവ് വ്യക്തിഗത ഇനത്തിൽ സ്വർണം നേടുന്ന ആദ്യ ഇന്ത്യൻ വനിതയായി ചരിത്രം കുറിച്ച കുംകും അനിൽ മോഹോദിനെയും പ്രധാനമന്ത്രി അഭിനന്ദിച്ചു. നിർണായക ഷൂട്ട്ഓഫിലെ താരത്തിന്റെ ആത്മസംയമനം പ്രത്യേകം ശ്രദ്ധേയമായിരുന്നുവെന്നും കൂടുതൽ നേട്ടങ്ങൾ കൈവരിക്കാൻ താരത്തിന് കഴിയട്ടെയെന്നും മോദി ആശംസിച്ചു.
