തിരുവനന്തപുരം: 2006ലെ കേരള സ്റ്റേറ്റ് ട്രാൻസ്‌പോർട്ട് പ്രോജക്ട് (കെഎസ്ടിപി) റോഡ് നിർമാണ പദ്ധതിയുമായി ബന്ധപ്പെട്ട അഴിമതി ആരോപണങ്ങളിലും മലേഷ്യൻ കരാറുകാരന്റെ മരണവുമായി ബന്ധപ്പെട്ടും മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ വിജിലൻസ് അന്വേഷണം നടത്താൻ കേരള ആഭ്യന്തരമന്ത്രി രമേശ് ചെന്നിത്തല ഉത്തരവിട്ടു.
ഗ്യാനേഷ് കുമാർ കേരളത്തിൽ പൊതുമരാമത്ത് വകുപ്പ് സെക്രട്ടറിയായി സേവനമനുഷ്ഠിച്ചിരുന്ന കാലയളവിലാണ് കെഎസ്ടിപി പദ്ധതിയുമായി ബന്ധപ്പെട്ട സംഭവം നടന്നത്. പദ്ധതിയുമായി ബന്ധപ്പെട്ട് പ്രവർത്തിച്ചിരുന്ന മലേഷ്യൻ കരാറുകാരന്റെ മരണവും അന്വേഷണത്തിന്റെ പരിധിയിൽ ഉൾപ്പെടും.
രാജ്യത്തുടനീളം വോട്ടർപട്ടികയിൽ നടക്കുന്ന സ്പെഷ്യൽ ഇൻ്റൻസീവ് റിവിഷൻ (എസ്ഐആർ) നടപടിക്കെതിരെ കോൺഗ്രസും മറ്റ് പ്രതിപക്ഷ പാർട്ടികളും ഗ്യാനേഷ് കുമാറിനെതിരെ പ്രതിഷേധം തുടരുന്നതിനിടെയാണ് പുതിയ നടപടി.
2006ൽ നടന്ന സംഭവവുമായി ബന്ധപ്പെട്ട് നേരത്തെ നടത്തിയ വിജിലൻസ് അന്വേഷണത്തിൽ ബാഹ്യ ഇടപെടലുകൾ ഉണ്ടായെന്ന ആരോപണങ്ങളും ഉയർന്നിട്ടുണ്ട്. മുൻ അന്വേഷണവുമായി ബന്ധപ്പെട്ട രേഖകൾ ഹാജരാക്കാൻ ആഭ്യന്തര വകുപ്പ് നിർദേശിച്ചതായും റിപ്പോർട്ടുകളുണ്ട്.
കേരള കേഡർ ഐഎഎസ് ഉദ്യോഗസ്ഥനായ ഗ്യാനേഷ് കുമാർ സംസ്ഥാനത്ത് വിവിധ വകുപ്പുകളിൽ ചുമതല വഹിച്ച ശേഷമാണ് കേന്ദ്രസർക്കാരിൻ്റെ വിവിധ മന്ത്രാലയങ്ങളിൽ സേവനമനുഷ്ഠിച്ചത്.
