ഈറോഡ്: സംസ്ഥാനത്തെ 26,000 സ്വയംസഹായ സംഘങ്ങളിലെ അംഗങ്ങൾക്കായി 3,000 കോടി രൂപയുടെ ബാങ്ക് വായ്പാ സഹായം വിതരണം ചെയ്ത് തമിഴ്നാട് മുഖ്യമന്ത്രി സി. ജോസഫ് വിജയ്. ഇന്ന് ഈറോഡ് ജില്ലയിലെ പെരുന്തുറൈയിൽ നടന്ന ചടങ്ങിലാണ് വായ്പാ വിതരണം നടത്തിയത്. ചടങ്ങിനിടെ ഗുണഭോക്താക്കളുമായി അദ്ദേഹം സൗഹൃദം പങ്കിടുകയും ചെയ്തു.
സംസ്ഥാനതലത്തിൽ വിതരണം ചെയ്ത 3,000 കോടി രൂപയിൽ വലിയൊരു വിഹിതം ഈറോഡ് ജില്ലയ്ക്കാണ് ലഭിച്ചത്. ജില്ലയിലെ 9,000ത്തിലധികം സ്വയംസഹായ സംഘം അംഗങ്ങൾക്കായി 1,110 കോടി രൂപയുടെ വായ്പാ സഹായമാണ് മുഖ്യമന്ത്രി കൈമാറിയത്. പെരുന്തുറൈയിലെ കാഞ്ചിക്കോവിൽ പിരിവിൽ സംഘടിപ്പിച്ച ചടങ്ങിലായിരുന്നു വിതരണം.
ഗുണഭോക്താക്കളുമായുള്ള മുഖ്യമന്ത്രിയുടെ ഹൃദ്യമായ ഇടപെടലുകളുടെ ദൃശ്യങ്ങൾ സമൂഹമാധ്യമങ്ങളിൽ വൈറലായിട്ടുണ്ട്. ഒരു വനിത വിജയ്‌ക്ക് ഉപഹാരം സമ്മാനിക്കുന്നതും മറ്റൊരു ഗുണഭോക്താവ് തൻ്റെ തിരിച്ചറിയൽ കാർഡിൽ അദ്ദേഹത്തിൻ്റെ കൈയൊപ്പ് ആവശ്യപ്പെടുന്നതുമായ ദൃശ്യങ്ങൾ ആരാധകർ വ്യാപകമായി പങ്കുവെച്ചിട്ടുണ്ട്.
