
ന്യൂഡൽഹി: ബയോഗ്യാസ് സാങ്കേതികവിദ്യയിലും പുനരുപയോഗ ഊർജ മേഖലയിലും നിർണായക സംഭാവനകൾ നൽകിയ ഇന്ത്യൻ ശാസ്ത്രജ്ഞൻ റാം ബക്സ് സിങ്ങിന്റെ (1925–2016) സ്മരണയ്ക്കായി തപാൽ വകുപ്പ് പ്രത്യേക സ്മാരക സ്റ്റാമ്പ് പുറത്തിറക്കി. നവംബർ 13-ന് ന്യൂഡൽഹിയിൽ നടന്ന ചടങ്ങിൽ കേന്ദ്ര സാമൂഹിക നീതി-ശാക്തീകരണ സഹമന്ത്രി രാംദാസ് അത്താവാലെയും ഡൽഹി സർക്കിളിലെ ചീഫ് പോസ്റ്റ്മാസ്റ്റർ ജനറൽ കേണൽ അഖിലേഷ് കുമാർ പാണ്ഡെയും ചേർന്നാണ് സ്റ്റാമ്പ് പ്രകാശനം ചെയ്തത്.
ഗ്രാമീണ മേഖലകളിൽ സുസ്ഥിര ഊർജ സ്രോതസ്സായി ബയോഗ്യാസ് സാങ്കേതികവിദ്യ വികസിപ്പിക്കുന്നതിലും പ്രചരിപ്പിക്കുന്നതിലും റാം ബക്സ് സിങ് നിർണായക പങ്കുവഹിച്ചു. 1957-ൽ ഉത്തർപ്രദേശിലെ സീതാപുരിൽ ഇന്ത്യയിലെ ആദ്യകാല വിജയകരമായ ചാണകവാതക പ്ലാന്റുകളിലൊന്ന് അദ്ദേഹം ഉദ്ഘാടനം ചെയ്തു. പിന്നീട് ഉത്തർപ്രദേശിലെ അജിത്മലിലുള്ള ഏഷ്യയിലെ ആദ്യത്തെ ഗോബർ ഗ്യാസ് ഗവേഷണ കേന്ദ്രത്തിന്റെ ചുമതല 16 വർഷം വഹിച്ചു. 15-ലധികം രാജ്യങ്ങളിലെ പുനരുപയോഗ ഊർജ പദ്ധതികളിലും അദ്ദേഹം സംഭാവനകൾ നൽകിയിട്ടുണ്ട്.

1975-ലെ അമേരിക്കൻ സെനറ്റ് റിപ്പോർട്ടിലുൾപ്പെടെ അദ്ദേഹത്തിന്റെ ഗവേഷണ പ്രവർത്തനങ്ങൾക്ക് അന്താരാഷ്ട്ര അംഗീകാരം ലഭിച്ചിട്ടുണ്ട്. ബയോഗ്യാസ് സാങ്കേതികവിദ്യയെക്കുറിച്ച് നിരവധി പുസ്തകങ്ങളും അദ്ദേഹം രചിച്ചു.
അദ്ദേഹത്തിന്റെ ഗവേഷണ പ്രബന്ധങ്ങളും ഔദ്യോഗിക രേഖകളും 2023 സെപ്റ്റംബറിൽ നാഷണൽ ആർക്കൈവ്സ് ഓഫ് ഇന്ത്യ ഏറ്റെടുക്കുകയും അഭിലേഖ് പടാൽ പോർട്ടലിലൂടെ ഡിജിറ്റൈസ് ചെയ്യുകയും ചെയ്തു. ശാസ്ത്രഗവേഷണം, ശുദ്ധ ഊർജം, ഗ്രാമീണ വികസനം എന്നീ മേഖലകളിലെ അദ്ദേഹത്തിന്റെ സംഭാവനകൾക്കുള്ള ആദരവായാണ് സ്മാരക സ്റ്റാമ്പ് പുറത്തിറക്കിയത്.



