കൊച്ചി: ബംഗാളി നടിയുടെ ലൈംഗികാരോപണ കേസിൽ സംവിധായകൻ രഞ്ജിത്തിന്റെ മുൻകൂർ ജാമ്യാപേക്ഷ ഹൈക്കോടതി തീർപ്പാക്കി. രഞ്ജിത്തിനെതിരെ ചുമത്തിയിരിക്കുന്നത് ജാമ്യം ലഭിക്കാവുന്ന വകുപ്പുകളാണെന്ന് സർക്കാർ കോടതിയിൽ വ്യക്തമാക്കിയിരുന്നു, ഇതു പരിഗണിച്ചാണ് കോടതിയുടെ നടപടി.
2009-ൽ നടന്നതായി ആരോപിക്കപ്പെടുന്ന സംഭവത്തിൽ, ഇന്ത്യൻ ശിക്ഷാ നിയമത്തിലെ 354-ാം വകുപ്പ് പ്രകാരമാണ് രഞ്ജിത്തിനെതിരെ കേസെടുത്തിരിക്കുന്നത്. ഈ കാലയളവിൽ ഇതൊരു ജാമ്യമുള്ള കുറ്റമായിരുന്നുവെന്നും, തന്റെ ആരോഗ്യപ്രശ്നങ്ങൾകൂടി പരിഗണിക്കണമെന്നുമാണ് രഞ്ജിത്ത് ഹർജിയിൽ വ്യക്തമാക്കിയത്.
‘പാലേരിമാണിക്യം’ എന്ന സിനിമയുടെ ഓഡിഷനായി വിളിച്ച ശേഷം, ലൈംഗിക ലക്ഷ്യത്തോടെ ശരീരത്തിൽ സ്പർശിച്ചു എന്നതാണ് നടിയുടെ പരാതി. ഈ കേസിന്റെ ഫലമായാണ് രഞ്ജിത്ത് ചലച്ചിത്ര അക്കാദമി ചെയർമാൻ സ്ഥാനം രാജിവെച്ചത്.
15 വർഷം പഴയ സംഭവത്തെ അടിസ്ഥാനമാക്കിയുള്ള പരാതി, തെറ്റായ ഉദ്ദേശ്യങ്ങളുടെ ഭാഗമാണെന്നും, ഇപ്പോഴത്തെ പരാതിക്ക് പിന്നിൽ നടിയിലുണ്ടായിരുന്ന നിരാശയും അമർഷവുമാണെന്നും രഞ്ജിത്ത് കോടതിയെ അറിയിച്ചിരുന്നു.
