തിരുവനന്തപുരം: മധ്യപടിഞ്ഞാറന് ബംഗാള് ഉള്ക്കടലില് ന്യൂനമര്ദം നിലനില്ക്കുന്നതിനാല് കേരളത്തില് ഇന്ന് (വ്യാഴാഴ്ച)യും നാളെയും (വെള്ളിയാഴ്ച)യും ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു. മഴയുടെ സാധ്യത കണക്കിലെടുത്ത് വിവിധ ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്.
വ്യാഴാഴ്ച തിരുവനന്തപുരം, വയനാട്, കണ്ണൂര് ജില്ലകളിലും വെള്ളിയാഴ്ച മലപ്പുറം, വയനാട്, കണ്ണൂര് ജില്ലകളിലും യെല്ലോ അലര്ട്ട് പുറപ്പെടുവിച്ചിട്ടുണ്ട്. 24 മണിക്കൂറിനിടെ 64.5 മില്ലിമീറ്റര് മുതല് 115.5 മില്ലിമീറ്റര് വരെ ലഭിക്കുന്ന മഴ ശക്തമായതായാണ് കണക്കാക്കുന്നത്.
ന്യൂനമര്ദം അടുത്ത 12 മണിക്കൂറില് വടക്ക്-വടക്കുകിഴക്ക് ദിശയിലേക്ക് സഞ്ചരിച്ചു ശക്തി കുറയുമെന്നാണ് കാലാവസ്ഥാ വകുപ്പിന്റെ വിലയിരുത്തല്. അതേസമയം, കേരള-കര്ണാടക തീരങ്ങളില് മത്സ്യബന്ധനത്തിന് നിലവില് തടസ്സമില്ല.
നാളെ രാത്രി 11.30 വരെ കന്യാകുമാരി തീരത്ത് കള്ളക്കടല് പ്രതിഭാസമായി 1.2 മുതല് 1.3 മീറ്റര് ഉയരമുള്ള തിരമാലകള് ഉണ്ടാകാമെന്നതിനാല് തീരദേശത്ത് കടലാക്രമണ സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം മുന്നറിയിപ്പ് നല്കി. മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണമെന്ന് അതില് വ്യക്തമാക്കുന്നു.
