ന്യൂഡൽഹി: രാജ്യത്തെ പതിനാറാമത് സെൻസസ് നടപടികൾക്ക് ഏപ്രിൽ മുതൽ തുടക്കമാകും, ഇത് ഇന്ത്യയിലെ ആദ്യ സമ്പൂർണ ഡിജിറ്റൽ സെൻസസ് ആയിരിക്കും. പരമ്പരാഗതമായി പേപ്പറും ബോർഡും ഉപയോഗിച്ചിരുന്ന രീതിക്ക് വിട നൽകി, ഡിജിറ്റൽ പ്ലാറ്റ്ഫോമുകൾ വഴി വിവരശേഖരണം നടത്താനാണ് തീരുമാനം. ഇതിനായി നാല് പ്രധാന ഡിജിറ്റൽ ടൂളുകൾ സർക്കാർ പുറത്തിറക്കിയിട്ടുണ്ട്. 2026 ഏപ്രിൽ 1 മുതൽ സെൻസസിന്റെ ആദ്യഘട്ടം ആരംഭിക്കും.
ഏകദേശം 11,718 കോടി രൂപ ചെലവ് പ്രതീക്ഷിക്കുന്ന ഈ വലിയ പദ്ധതി രണ്ട് ഘട്ടങ്ങളിലായി നടപ്പാക്കും. സെന്റർ ഫോർ ഡെവലപ്മെന്റ് ഓഫ് അഡ്വാൻസ്ഡ് കമ്പ്യൂട്ടിംഗ് (C-DAC) വികസിപ്പിച്ച ഡിജിറ്റൽ പ്ലാറ്റ്ഫോമുകൾ ഉപയോഗിച്ചാണ് രാജ്യത്താകമാനം വിവരശേഖരണം നടത്തുക. ഇതിലൂടെ വിവര ശേഖരണത്തിലെ കൃത്യതയും വേഗതയും വർധിപ്പിക്കാനാകും എന്നാണ് കേന്ദ്രസർക്കാരിന്റെ വിലയിരുത്തൽ. ഡിജിറ്റൽ സാങ്കേതിക വിദ്യയുടെ സഹായത്തോടെ സെൻസസ് നടപടികൾ കൂടുതൽ കാര്യക്ഷമമാക്കുക എന്നതാണ് പദ്ധതിയുടെ പ്രധാന ലക്ഷ്യം.
