തിരുവനന്തപുരം: കേരളത്തിൽ ഉത്പാദിപ്പിക്കുന്ന ഉത്പന്നങ്ങൾക്കും സേവനങ്ങൾക്കും ആഗോള വിപണിയിൽ കൂടുതൽ പ്രാധാന്യം ലഭ്യമാക്കുന്നതിനുള്ള ‘കേരള ബ്രാൻഡ്’ പോർട്ടൽ വ്യവസായ വകുപ്പ് മന്ത്രി പി.കെ. കുഞ്ഞാലിക്കുട്ടി ഉദ്ഘാടനം ചെയ്തു.
സംസ്ഥാന വ്യവസായ വാണിജ്യ ഡയറക്ടറേറ്റ് തയ്യാറാക്കിയ പോർട്ടലിലൂടെ ഉയർന്ന ഗുണനിലവാരവും തനിമയും പുലർത്തുന്ന തദ്ദേശീയ ഉൽപ്പന്നങ്ങൾക്ക് ‘MADE IN KERALA’ എന്ന ആഗോള ബ്രാൻഡ് ലഭിക്കും.
ആദ്യഘട്ടത്തിൽ വെളിച്ചെണ്ണ, കാപ്പി, തേയില, പാദരക്ഷ, നെയ്യ്, തേൻ, കുപ്പിവെള്ളം, പ്ലൈവുഡ്, പി.വി.സി പൈപ്പ്, സർജിക്കൽ റബ്ബർ ഗ്ലൗസ്, കാലിത്തീറ്റ എന്നീ 11 ഉൽപ്പന്നങ്ങൾക്കാണ് കേരള ബ്രാൻഡ് അംഗീകാരം നൽകുന്നത്.
കേരളത്തിൽ നിന്നുള്ള അസംസ്കൃത വസ്തുക്കൾ ഉപയോഗിക്കുന്നതും പരിസ്ഥിതി സൗഹൃദവും ബാലവേലയും വിവേചനവും ഇല്ലാത്ത തൊഴിൽ സാഹചര്യങ്ങളിൽ നിർമിക്കുന്നതുമായ ഉത്പന്നങ്ങൾക്കാണ് അംഗീകാരം ലഭിക്കുക. നിശ്ചിത ഗുണനിലവാര മാനദണ്ഡങ്ങൾക്കൊപ്പം ഉയർന്ന ധാർമികതയും ഉത്തരവാദിത്തപരമായ വ്യാവസായിക രീതികളും സ്ഥാപനങ്ങൾ പാലിക്കണം.
കേരളത്തിൽ ഉത്പാദന യൂണിറ്റും UDYAM രജിസ്ട്രേഷനും ആവശ്യമായ ഗുണനിലവാര സർട്ടിഫിക്കറ്റുകളുമുള്ള സംരംഭകർക്ക് പോർട്ടൽ വഴി അപേക്ഷിക്കാം. താലൂക്ക് തല പരിശോധനകൾക്ക് ശേഷമാണ് സർട്ടിഫിക്കേഷൻ അനുവദിക്കുക.
