ന്യൂഡൽഹി: ബുധനാഴ്ച നടക്കുന്ന 11-ാമത് ആയുർവേദ ദിനത്തിന് മുന്നോടിയായി രാജ്യത്താകെ ആയുർവേദത്തിന് പിന്തുണ പ്രഖ്യാപിച്ച് 89 ലക്ഷത്തിലധികം പേർ പങ്കാളികളായതായി ആയുഷ് മന്ത്രാലയം അറിയിച്ചു.
‘ആരോഗ്യമുള്ള നാളേക്കായി ആയുർവേദം’ എന്ന പ്രമേയത്തിലാണ് ഈ വർഷത്തെ ആയുർവേദ ദിനാചരണം. ഇന്ത്യയിലെ എല്ലാ സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി 9,700ലധികം പരിപാടികൾ സംഘടിപ്പിച്ചതായും ഔദ്യോഗിക വെബ്സൈറ്റിലൂടെ 3.6 ലക്ഷത്തിലധികം പേർ രജിസ്റ്റർ ചെയ്തതായും മന്ത്രാലയം വ്യക്തമാക്കി.
ആയുർവേദ ദിനം 2026 മൈക്രോസൈറ്റിലൂടെ ഏകദേശം 89.3 ലക്ഷം പേർ ആയുർവേദത്തിന് പിന്തുണ പ്രഖ്യാപിച്ചു.
രാജ്യത്തിന് പുറത്തും ആയുർവേദ ദിനാചരണത്തിന് പിന്തുണ ലഭിക്കുന്നുണ്ട്. 10 രാജ്യങ്ങളിലും പ്രദേശങ്ങളിലുമായി 1,900ലധികം പേർ പങ്കെടുത്ത പരിപാടികൾ റിപ്പോർട്ട് ചെയ്തതായി മന്ത്രാലയം വ്യക്തമാക്കി.
