ഡൽഹി : സ്മാർട്ട്ഫോൺ ബാറ്ററി വേഗത്തിൽ തീർക്കുന്ന ആപ്പുകളെ കുറിച്ച് ഉപയോക്താക്കളെ മുന്നറിയിപ്പുനൽകുന്ന പുതിയ ഫീച്ചർ അവതരിപ്പിച്ച് ഗൂഗിൾ പ്ലേ സ്റ്റോർ. ബാറ്ററി അധികമായി ഉപയോഗിക്കുന്ന ആപ്പുകൾ തിരിച്ചറിയാൻ സഹായിക്കുന്ന ഈ സംവിധാനത്തിലൂടെ ഫോണിന്റെ പ്രകടനം മെച്ചപ്പെടുത്താനും ബാറ്ററി ലൈഫ് വർധിപ്പിക്കാനും ഉപയോക്താക്കൾക്ക് കഴിയുമെന്നാണ് ഗൂഗിൾ വ്യക്തമാക്കുന്നത്.
പുതിയ അപ്ഡേറ്റോടെ ചില ആപ്പുകളുടെ പ്ലേ സ്റ്റോർ പേജുകളിൽ “ഈ ആപ്പ് പ്രതീക്ഷിച്ചതിനേക്കാൾ കൂടുതൽ ബാറ്ററി ഉപയോഗിക്കാം” എന്ന മുന്നറിയിപ്പ് സന്ദേശം കാണിക്കും. ആപ്പ് ഇൻസ്റ്റാൾ ചെയ്യുന്നതിന് മുൻപ് തന്നെ ഈ വിവരം കാണാൻ സാധിക്കുന്നതിനാൽ ഉപയോക്താക്കൾക്ക് കൂടുതൽ ബോധപൂർവമായ തീരുമാനങ്ങൾ എടുക്കാൻ കഴിയും. ആൻഡ്രോയിഡ് ഉപകരണങ്ങളിൽ നിന്നുള്ള യഥാർത്ഥ ഉപയോഗ ഡാറ്റയുടെ അടിസ്ഥാനത്തിലാണ് ഈ മുന്നറിയിപ്പ് നൽകുന്നത്.
ആപ്പുകളുടെ പ്രകടനം നിരീക്ഷിക്കാൻ ഗൂഗിൾ ഉപയോഗിക്കുന്ന സംവിധാനമാണ് “ആൻഡ്രോയിഡ് വിറ്റൽസ്”. ഏതെങ്കിലും ആപ്പ് സാധാരണയേക്കാൾ കൂടുതൽ ബാറ്ററി ഉപയോഗിക്കുന്നതായി കണ്ടെത്തിയാൽ അതിന് മുന്നറിയിപ്പ് ലേബൽ നൽകും. ഈ ഫീച്ചർ ഘട്ടംഘട്ടമായി നടപ്പിലാക്കുന്നതിനാൽ അടുത്ത കുറച്ച് ആഴ്ചകളിൽ കൂടുതൽ ആപ്പുകളിൽ ഇത് കാണാൻ തുടങ്ങും.
സ്ക്രീൻ ഓഫ് ആയിരിക്കുമ്പോഴും ചില ആപ്പുകൾ പശ്ചാത്തലത്തിൽ പ്രവർത്തിക്കുന്നതുകൊണ്ടാണ് ബാറ്ററി വേഗത്തിൽ തീരുന്നത്. “പാർഷ്യൽ വേക്ക് ലോക്ക്” എന്ന സവിശേഷത ഉപയോഗിച്ച് ഫോണിന്റെ പ്രോസസർ സജീവമായി തുടരാൻ ആപ്പുകൾക്ക് സാധിക്കും. എന്നാൽ ഈ സംവിധാനം അധികമായി ഉപയോഗിച്ചാൽ ബാറ്ററി വേഗത്തിൽ തീരാൻ സാധ്യതയുണ്ട്. അതേസമയം കൂടുതൽ ബാറ്ററി ഉപയോഗിക്കുന്നതായി കണ്ടെത്തുന്ന ആപ്പുകൾക്ക് പ്ലേ സ്റ്റോറിലെ ദൃശ്യത കുറയാനും, അതുവഴി ഡൗൺലോഡുകളുടെ എണ്ണത്തിലും കുറവ് വരാനുമിടയുണ്ടെന്ന് റിപ്പോർട്ടുകൾ പറയുന്നു.
