തിരുവനന്തപുരം: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ സ്ഥാനത്തുനിന്ന് നീക്കണമെന്ന് ആവശ്യപ്പെട്ട് കേരള നിയമസഭ തിങ്കളാഴ്ച പ്രമേയം പാസാക്കി. വോട്ടർപട്ടികയിലെ പ്രത്യേക തീവ്ര പരിഷ്കരണവുമായി (SIR) ബന്ധപ്പെട്ട വിവാദങ്ങൾക്കിടെയാണ് നിയമസഭയുടെ നടപടി.
മുഖ്യമന്ത്രി വി.ഡി. സതീശനാണ് പ്രമേയം അവതരിപ്പിച്ചത്. എസ്.ഐ.ആർ നടപടിക്കെതിരെ മുതിർന്ന കോൺഗ്രസ് നേതാവ് രാഹുൽ ഗാന്ധിയുടെ നേതൃത്വത്തിൽ പ്രതിഷേധം ശക്തമാകുന്നതിനിടെയാണ് നിയമസഭയിൽ പ്രമേയം പാസാക്കിയത്.
ജനാധിപത്യത്തിന്റെ അടിത്തറ വോട്ടവകാശമാണെന്നും പൗരന്മാരുടെ ഭരണഘടനാപരമായ അവകാശങ്ങൾ ഹനിക്കാൻ ഒരു സ്ഥാപനത്തെയും അനുവദിക്കരുതെന്നും സതീശൻ പ്രതികരിച്ചു. പ്രമേയം പാസാക്കിയതിന് പിന്നാലെ എക്‌സിൽ പങ്കുവെച്ച കുറിപ്പിലായിരുന്നു അദ്ദേഹത്തിന്റെ പ്രതികരണം.
വോട്ടവകാശം സംരക്ഷിക്കപ്പെടണമെന്നും ഭരണഘടന ഉയർത്തിപ്പിടിക്കണമെന്നും ജനാധിപത്യം നിലനിൽക്കണമെന്നും അദ്ദേഹം വ്യക്തമാക്കി. സ്വതന്ത്രവും നീതിപൂർവവുമായ തിരഞ്ഞെടുപ്പുകൾ ഉറപ്പാക്കുന്നതിനുള്ള നിലപാടിൽ കേരളം ഉറച്ചുനിൽക്കുമെന്നും അദ്ദേഹം കൂട്ടിച്ചേർത്തു.
