ന്യൂഡൽഹി: പശ്ചിമേഷ്യയിൽ തുടരുന്ന പ്രതിസന്ധികൾക്കിടയിലും ഇന്ത്യയുടെ സാമ്പത്തിക വളർച്ച ശക്തമായി തുടരുകയാണെന്ന് പ്രധാനമന്ത്രി നരേന്ദ്ര മോദി. അടുത്ത 10 മുതൽ 11 വർഷത്തിനുള്ളിൽ രാജ്യത്ത് ഏകദേശം 500 ജിഗാവാട്ട് പുനരുപയോഗ ഊർജ ഉൽപ്പാദനശേഷി കൂടി വികസിപ്പിക്കുമെന്നും അദ്ദേഹം വ്യക്തമാക്കി.
ഭാരത് റിന്യൂവബിൾ എനർജി ഉച്ചകോടിയുടെയും എക്സ്പോയുടെയും 2026-ലെ ഉദ്ഘാടന സമ്മേളനത്തിൽ സംസാരിക്കുകയായിരുന്നു പ്രധാനമന്ത്രി.
നിലവിൽ ഇന്ത്യയുടെ ഫോസിൽ ഇതര ഊർജ ഉൽപ്പാദനശേഷി 300 ജിഗാവാട്ട് പിന്നിട്ടതായി അദ്ദേഹം പറഞ്ഞു. 2030-ഓടെ 500 ജിഗാവാട്ട് പുനരുപയോഗ ഊർജശേഷി കൈവരിക്കുകയെന്ന ലക്ഷ്യം രാജ്യം നേടുമെന്നും അദ്ദേഹം ആത്മവിശ്വാസം പ്രകടിപ്പിച്ചു.
അടുത്ത 10 മുതൽ 11 വർഷത്തിനുള്ളിൽ 500 ജിഗാവാട്ട് പുനരുപയോഗ ഊർജശേഷി കൂടി കൂട്ടുകയെന്നത് വെല്ലുവിളി നിറഞ്ഞ ലക്ഷ്യമാണെങ്കിലും അത് കൈവരിക്കേണ്ടതുണ്ടെന്നും മോദി പറഞ്ഞു.
