ബസ്തർ: ഛത്തീസ്ഗഢിലെ ബസ്തർ ജില്ലയിലെ കരൺപൂരിലുള്ള കോബ്ര ഓപ്പറേഷൻസ് ബേസിൽ സുരക്ഷാ സേനാംഗങ്ങൾക്കൊപ്പം ദീപാവലി ആഘോഷിച്ച് പ്രധാനമന്ത്രി നരേന്ദ്ര മോദി. ബസ്തറിലും അബുജ്മദിലും നക്സൽ വിരുദ്ധ പ്രവർത്തനങ്ങൾക്കുള്ള പരിശീലന കേന്ദ്രമായും ഓപ്പറേഷൻ ആരംഭിക്കുന്ന താവളമായും പ്രവർത്തിച്ചിരുന്ന കേന്ദ്രത്തിലാണ് പ്രധാനമന്ത്രി എത്തിയത്.
രാജ്യത്തും വിദേശത്തുമുള്ള കോടിക്കണക്കിന് ഇന്ത്യക്കാർ കുടുംബാംഗങ്ങൾക്കൊപ്പം ദീപാവലി ആഘോഷിക്കുന്ന വേളയിൽ രാജ്യത്തിൻ്റെ സുരക്ഷയ്ക്കായി പ്രവർത്തിക്കുന്ന സൈനികർക്കൊപ്പം ആഘോഷത്തിൽ പങ്കുചേരാനായതിൽ സന്തോഷമുണ്ടെന്ന് അദ്ദേഹം പറഞ്ഞു. കാർഗിൽ, ഹിമാലയത്തിലെ ലെപ്ച, തീരപ്രദേശത്തെ സർ ക്രീക്ക്, കടലിൽ ഐഎൻഎസ് വിക്രാന്ത് എന്നിവിടങ്ങളിൽ സൈനികർക്കൊപ്പം ദീപാവലി ആഘോഷിച്ച അനുഭവങ്ങളും പ്രധാനമന്ത്രി അനുസ്മരിച്ചു. രാജ്യത്തിൻ്റെ അതിർത്തികളിലും ആഭ്യന്തര സുരക്ഷാ രംഗത്തും പ്രവർത്തിക്കുന്ന സൈനികർ തൻ്റെ കുടുംബത്തിൻ്റെ ഭാഗമാണെന്നും അദ്ദേഹം പറഞ്ഞു.
മാവോയിസ്റ്റ് ഭീകരതയ്ക്കെതിരായ പതിറ്റാണ്ടുകൾ നീണ്ട പോരാട്ടത്തിൽ രാജ്യം വിജയം കൈവരിച്ചതിന് ശേഷമുള്ള ആദ്യ ദീപാവലിയെന്ന നിലയിൽ 2026-ലെ ആഘോഷത്തിന് പ്രത്യേക പ്രാധാന്യമുണ്ടെന്ന് മോദി പറഞ്ഞു. രാജ്യത്തെ എല്ലാ ജില്ലകളെയും നക്സൽ മുക്തമാക്കാനും കോടിക്കണക്കിന് ജനങ്ങളുടെ ഭയം അകറ്റാനും കഴിഞ്ഞത് സുരക്ഷാ സേനയുടെ ത്യാഗത്തിൻ്റെയും അർപ്പണബോധത്തിൻ്റെയും ഫലമാണെന്നും അദ്ദേഹം കൂട്ടിച്ചേർത്തു.
സിആർപിഎഫ്, കോബ്ര, ബിഎസ്എഫ്, ഐടിബിപി, എസ്എസ്ബി, സംസ്ഥാന പൊലീസ് സേനകൾ, ബസ്തർ ഫൈറ്റേഴ്സ് കമാൻഡോകൾ, വനിതാ സേനാംഗങ്ങൾ എന്നിവരുടെ സേവനങ്ങളെ പ്രധാനമന്ത്രി അഭിനന്ദിച്ചു. നക്സലിസം ശക്തമായിരുന്ന കാലത്ത് രാജ്യത്തെ 20 ഓളം സംസ്ഥാനങ്ങളിലെ 230-ലധികം ജില്ലകൾ ഇടതുപക്ഷ തീവ്രവാദത്തിൻ്റെ പിടിയിലായിരുന്നുവെന്ന് അദ്ദേഹം പറഞ്ഞു. 2010-ലെ ദന്തേവാഡ ആക്രമണങ്ങളിൽ 76 സിആർപിഎഫ് ജവാന്മാരും 44 സാധാരണക്കാരും കൊല്ലപ്പെട്ട സംഭവവും അദ്ദേഹം അനുസ്മരിച്ചു.
2014-നുശേഷം സ്വീകരിച്ച ശക്തമായ നടപടികൾ രാജ്യത്തെ സുരക്ഷാ സാഹചര്യം മാറ്റിയെന്നും സുരക്ഷാ സേനയുടെ പ്രവർത്തനങ്ങൾക്ക് പൂർണ സ്വാതന്ത്ര്യം നൽകിയെന്നും മോദി പറഞ്ഞു. മാവോയിസ്റ്റ് സംഘങ്ങളുടെ സാമ്പത്തിക സ്രോതസ്സുകൾ തകർക്കുകയും ആയുധങ്ങളുടെ വിതരണം തടയുകയും പുതിയ അംഗങ്ങളെ റിക്രൂട്ട് ചെയ്യുന്നതിനുള്ള നീക്കങ്ങൾ നിയന്ത്രിക്കുകയും ചെയ്തുവെന്ന് അദ്ദേഹം അവകാശപ്പെട്ടു.
കഴിഞ്ഞ ഒരു വർഷത്തിനിടെ ഡ്യൂട്ടിക്കിടെ ഒരു സിആർപിഎഫ് ജവാനും ജീവൻ നഷ്ടപ്പെട്ടിട്ടില്ലെന്നും സേനയുടെ 47 വർഷത്തെ ചരിത്രത്തിലെ ആദ്യത്തെ നേട്ടമാണിതെന്നും പ്രധാനമന്ത്രി പറഞ്ഞു. രാജ്യത്തിൻ്റെ ശരിയായ നയങ്ങളുടെയും സുരക്ഷാ സേനയുടെ ധീരതയുടെയും വിജയമാണിതെന്നും അദ്ദേഹം കൂട്ടിച്ചേർത്തു.
സുരക്ഷാ നടപടികൾക്കൊപ്പം നക്സൽ ബാധിത മേഖലകളിൽ വികസനവും ജനസേവനവും ഉറപ്പാക്കിയതാണ് വിജയത്തിന് സഹായകമായതെന്ന് മോദി പറഞ്ഞു. പ്രാദേശിക ജനങ്ങളുടെ സഹകരണവും നിർണായകമായിരുന്നുവെന്നും അദ്ദേഹം വ്യക്തമാക്കി.
കഴിഞ്ഞ 12 വർഷത്തിനിടെ നക്സലിസത്തിനും വിഘടനവാദത്തിനുമെതിരായ പോരാട്ടത്തിൽ മാത്രമല്ല, ദാരിദ്ര്യ നിർമാർജനത്തിലും രാജ്യം വലിയ നേട്ടം കൈവരിച്ചതായി പ്രധാനമന്ത്രി പറഞ്ഞു. ദീപാവലിക്ക് തൊട്ടുമുമ്പ് പുറത്തുവന്ന ലോകബാങ്ക് റിപ്പോർട്ട് ചൂണ്ടിക്കാട്ടി, കഴിഞ്ഞ 12 വർഷത്തിനിടെ 50 കോടി ഇന്ത്യക്കാർ കടുത്ത ദാരിദ്ര്യത്തിൽനിന്ന് പുറത്തുവന്നതായി അദ്ദേഹം അവകാശപ്പെട്ടു.
ജൻധൻ ബാങ്ക് അക്കൗണ്ടുകൾ, പ്രധാനമന്ത്രി ആവാസ് യോജന, മുദ്ര വായ്പകൾ, പിഎം സ്വനിധി, ആയുഷ്മാൻ ഭാരത്, സൗജന്യ ഭക്ഷ്യധാന്യ വിതരണം, സ്വച്ഛ് ഭാരത്, ഹർ ഘർ ജൽ തുടങ്ങിയ പദ്ധതികൾ സാധാരണക്കാരുടെ ജീവിതത്തിൽ വലിയ മാറ്റമുണ്ടാക്കിയെന്നും മോദി പറഞ്ഞു.
ദീപാവലി രംഗോലിയിൽ വ്യത്യസ്ത വരകൾ ഒന്നിച്ചുചേർന്ന് മനോഹരമായ ചിത്രം രൂപപ്പെടുന്നതുപോലെ വിവിധ ക്ഷേമപദ്ധതികൾ ഒന്നിച്ചുചേർന്നാണ് ജനങ്ങളുടെ ജീവിതത്തിൽ മാറ്റമുണ്ടാക്കിയതെന്ന് അദ്ദേഹം പറഞ്ഞു. ദരിദ്ര കുടുംബങ്ങളുടെ ആശങ്കകൾ കുറയ്ക്കാനും മെച്ചപ്പെട്ട ഭാവിയെക്കുറിച്ചുള്ള ആത്മവിശ്വാസം വളർത്താനും സർക്കാരിൻ്റെ പദ്ധതികൾ സഹായിച്ചിട്ടുണ്ടെന്നും പ്രധാനമന്ത്രി കൂട്ടിച്ചേർത്തു.
