തിരുവനന്തപുരം: ഈ വർഷത്തെ സംസ്ഥാന സ്കൂൾ കായികമേളയ്ക്ക് ബ്രാൻഡ് അംബാസഡറായി ഹോക്കി താരം പിആർ ശ്രീജേഷിനെ നിയമിച്ചു. നവംബർ 4ന് കൊച്ചിയിലെ മഹാരാജാസ് കോളേജ് ഗ്രൗണ്ടിൽ ആരംഭിക്കുന്ന മേളയിൽ, വിദ്യാഭ്യാസ വകുപ്പിന്റെ കീഴിൽ ആദ്യമായി ഭിന്നശേഷിയുള്ള 2000 കുട്ടികൾ മത്സരത്തിനൊപ്പം പങ്കെടുക്കും.
17 വേദികളിലായി 24,000 കുട്ടികൾ മാറ്റുരക്കുമ്പോൾ, മേളയുടെ ഉദ്ഘാടന ചടങ്ങുകളിൽ ദേശീയ നിലവാരത്തിൽ കലാപരിപാടികളും സംഘടിപ്പിക്കും. കായിക മികവിൽ മികച്ച ജില്ലയ്ക്ക് മുഖ്യമന്ത്രി പിണറായി വിജയൻ മെഡൽ സമ്മാനിക്കും. മേളയ്ക്ക് ലഭിക്കുന്ന മികച്ച മാധ്യമപിന്തുണയ്ക്കായി എറണാകുളം പ്രസ്സ് ക്ലബ്ബിൽ പ്രത്യേക മീഡിയ റൂമും ഒരുക്കിയിട്ടുണ്ട്.
