കോഴിക്കോട്: ചോദ്യ പേപ്പർ ചോർച്ചയുമായി ബന്ധപ്പെട്ട് എംഎസ് സൊല്യൂഷൻസിലെ രണ്ട് അധ്യാപകരെ ക്രൈംബ്രാഞ്ച് കസ്റ്റഡിയിൽ എടുത്തു. പുലർച്ചെ 4.30 ഓടെ കൊടുവള്ളി വാവാട്ടെ താമസസ്ഥലത്ത് അധ്യാപകരായ ഫഹദ്, ജിഷ്ണു എന്നിവരെയാണ് കസ്റ്റഡിയിൽ എടുത്തത്.
എംഎസ് സൊല്യൂഷൻസ് ഉടമ മുഹമ്മദ് ഷുഹൈബ് ഒളിവിലാണ്, ഇയാൾക്കെതിരെ തിരച്ചിൽ നോട്ടിസ് പുറപ്പെടുവിച്ചിരിക്കുകയാണ്. വിദ്യാഭ്യാസ വകുപ്പ് നടത്തിയ അന്വേഷണത്തിൽ 2017ൽ ആരംഭിച്ച എംഎസ് സൊല്യൂഷൻസ് യൂട്യൂബ് ചാനൽ കഴിഞ്ഞ മൂന്ന് പാദവാർഷിക പരീക്ഷകളിലായി പൊതുവിദ്യാലയങ്ങളിലെ ചോദ്യക്കടലാസ് ചോർത്തി നൽകിയതായി കണ്ടെത്തി. 2024 ക്രിസ്മസ് പരീക്ഷയുടെ ചോദ്യങ്ങൾ പ്രവചിച്ചതിനുശേഷം ചാനലിന്റെ വ്യൂവർഷിപ്പിൽ വൻ വർധനയുണ്ടായി.
മാർച്ചിൽ നടന്ന എസ്എസ്എൽസി പരീക്ഷയും ഇക്കൊല്ലത്തെ ഓണം, ക്രിസ്മസ് പരീക്ഷകളുടെ ചോദ്യങ്ങൾ അതേപടി പ്രത്യക്ഷപ്പെട്ടതായി കണ്ടെത്തി. എസ്എസ്എൽസി, പ്ലസ് വൺ പരീക്ഷകളിലെ ചോദ്യങ്ങൾ ക്രമനമ്പർ പോലും തെറ്റാതെ പ്രവചിച്ച വീഡിയോ രണ്ട് ലക്ഷത്തോളം പേർ കണ്ടത് വലിയ വിവാദമായിരുന്നു.
ചോദ്യ ചോർച്ചയിലെ മുഖ്യകഥാപാത്രം മുഹമ്മദ് ഷുഹൈബിനായി പോലീസ് തെരച്ചിൽ ശക്തമാക്കി. സംഭവത്തിൽ കൂടുതൽ പൊലീസ് നടപടികൾ ഉടൻ ഉണ്ടാകുമെന്ന് അധികൃതർ അറിയിച്ചു.
