ജാംനഗർ: പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള കേന്ദ്ര സർക്കാർ പ്രത്യേക സഹകരണ മന്ത്രാലയം രൂപീകരിച്ചതോടെ രാജ്യത്തെ സഹകരണ പ്രസ്ഥാനത്തിന് പുതിയ ഊർജവും വേഗവും ലഭിച്ചതായി കേന്ദ്ര ആഭ്യന്തര-സഹകരണ മന്ത്രി അമിത് ഷാ പറഞ്ഞു.
ജാംനഗർ ജില്ലാ സഹകരണ ബാങ്കിൻ്റെ പുതുതായി നിർമ്മിച്ച ആസ്ഥാന മന്ദിരമായ സഹകാർ ഭവൻ ഓൺലൈനായി ഉദ്ഘാടനം ചെയ്ത ശേഷം സംസാരിക്കുകയായിരുന്നു അദ്ദേഹം. ചടങ്ങിൽ ഗുജറാത്ത് മുഖ്യമന്ത്രി ഭൂപേന്ദ്ര പട്ടേലും പങ്കെടുത്തു.
സഹകരണ മേഖലയെ കൂടുതൽ ശക്തിപ്പെടുത്താൻ ആധുനികവത്കരണം അനിവാര്യമാണെന്ന് അമിത് ഷാ പറഞ്ഞു. സഹകരണ സ്ഥാപനങ്ങളുടെ ആസ്ഥാന മന്ദിരങ്ങളും പ്രവർത്തന സംവിധാനങ്ങളും നവീകരിക്കുന്നതിലൂടെയാണ് ഈ മാറ്റത്തിന് തുടക്കമാകുന്നതെന്നും, അതുവഴി സഹകരണ മേഖലയെ കൂടുതൽ കാര്യക്ഷമവും ജനകീയവുമാക്കാൻ കഴിയുമെന്നും അദ്ദേഹം വ്യക്തമാക്കി.
