പാരീസ്: ആര്ട്ടിഫിഷ്യല് ഇന്റലിജന്സിന്റെ (AI) വിശ്വാസ്യത, സുതാര്യത, പക്ഷപാതരഹിതത്വം ഉറപ്പാക്കുന്നതിന് ആഗോള തലത്തില് ചട്ടക്കൂട് നിര്മിക്കേണ്ടതിന്റെ ആവശ്യകത പ്രധാനമന്ത്രി നരേന്ദ്രമോദി ഉന്നയിച്ചു. പാരീസില് നടന്ന ആഗോള എഐ ഉച്ചകോടിയില് സംസാരിക്കുകയായിരുന്നു അദ്ദേഹം.
“എഐ ഈ നൂറ്റാണ്ടില് മനുഷ്യരാശിക്കുള്ള കോഡ് എഴുതുകയാണ്. അതിനാല് അതിന് മൂല്യാധിഷ്ഠിതവും, അപകടസാധ്യതകള് പരിഹരിക്കുന്നതുമായ നിയന്ത്രണങ്ങളും മാനദണ്ഡങ്ങളും ആവശ്യമുണ്ട്,” മോദി പറഞ്ഞു.
മോദി സാങ്കേതികവിദ്യയുടെ ജനാധിപത്യവല്ക്കരണത്തിന്റെ ആവശ്യകത ചൂണ്ടിക്കാട്ടി. സൈബര് സുരക്ഷ, തെറ്റായ വിവരങ്ങള്, ഡീപ്ഫേക്ക് പ്രചാരണങ്ങള് എന്നിവ തടയാന് കര്ശന നടപടികള് വേണമെന്ന് അദ്ദേഹം ആവശ്യപ്പെട്ടു.
പക്ഷപാതരഹിതവും വിശ്വാസ്യതയുള്ളതുമായ ഡാറ്റാ എക്കോസിസ്റ്റം വികസിപ്പിക്കേണ്ടത് അനിവാര്യമാണെന്നും ഓപ്പണ് സോഴ്സ് എഐ സംവിധാനങ്ങള് കൂടുതല് പ്രോത്സാഹിപ്പിക്കേണ്ടതുണ്ടെന്നും മോദി കൂട്ടിച്ചേര്ത്തു.
ദക്ഷിണാര്ധ ഗോളത്തിലെ രാജ്യങ്ങള്ക്ക് പ്രത്യേക പരിഗണന വേണം
“എഐ നൂതന ആശയങ്ങള്ക്ക് വഴിതെളിയിക്കുകയും ലോകത്തിലെ എല്ലാ രാജ്യങ്ങള്ക്കും പ്രയോജനപ്പെടുന്ന വിധത്തില് വികസിപ്പിക്കുകയും ചെയ്യണം. പ്രത്യേകിച്ച് ഇന്ത്യ ഉള്പ്പെടുന്ന ദക്ഷിണാര്ധ ഗോളത്തിലെ രാജ്യങ്ങള്ക്ക് എഐ മേഖലയില് കമ്പ്യൂട്ടിങ്, വൈദ്യുതി, നൈപുണ്യ വികസനം, ഡാറ്റാ സൗകര്യങ്ങള് എന്നിവയിലുണ്ടായിരിക്കുന്ന കുറവ് പരിഹരിക്കേണ്ടതുണ്ട്,” പ്രധാനമന്ത്രി വ്യക്തമാക്കി.
ആരോഗ്യം, വിദ്യാഭ്യാസം, കൃഷി മേഖലകളില് എഐക്ക് വിപ്ലവകരമായ മാറ്റം വരുത്താനാകുമെന്ന് പ്രധാനമന്ത്രി പറഞ്ഞു. എഐ മൂലമുള്ള തൊഴില് നഷ്ടങ്ങളെക്കുറിച്ചുള്ള ആശങ്കകള് ഉന്നയിച്ചെങ്കിലും, സാങ്കേതിക പുരോഗതി പുതിയ തൊഴില് അവസരങ്ങള് സൃഷ്ടിക്കുമെന്നും ചരിത്രം ഇതിനകം തന്നെ തെളിയിച്ചിട്ടുണ്ടെന്നും അദ്ദേഹം ഓര്മ്മിപ്പിച്ചു.
ആഗോള തലത്തില് എഐയുടെ ഉത്തരവാദിത്വപൂര്ണ ഉപയോഗം ഉറപ്പാക്കേണ്ടത് അനിവാര്യമാണെന്നും, അതിനായി രാജ്യങ്ങള് തമ്മിലുള്ള സഹകരണം നിര്ണായകമാണെന്നും മോദി തന്റെ പ്രസംഗത്തില് വിശദീകരിച്ചു.
