തൃശൂര്: ഗുരുവായൂര് ക്ഷേത്രത്തിലെ പുതിയ മേല്ശാന്തിയായി മലപ്പുറം മുതൂര് കവ്രപമാ റത്ത് മനയിലെ കെ.എം അച്യുതന് നമ്പൂതിരിയെ (58) തെരഞ്ഞെടുത്തു. ഏപ്രില് ഒന്നുമുതല് അടുത്ത ആറ് മാസത്തേക്കാണ് അദ്ദേഹത്തിന്റെ കാലാവധി.
ക്ഷേത്രം തന്ത്രി പി.സി. ദിനേശന് നമ്പൂതിരിപ്പാടിന്റെ സാന്നിധ്യത്തിലാണ് നറുക്കെടുപ്പ് നടന്നത്. ഉച്ചപൂജ നിര്വഹിച്ച മേല്ശാന്തി പുതുമന ശ്രീജിത്ത് നമ്പൂതിരിയാണ് നമസ്ക്കാര മണ്ഡപത്തില് വെള്ളിക്കുടത്തില് നിന്ന് നറുക്കെടുത്തത്. മേല്ശാന്തി തെരഞ്ഞെടുപ്പിനായി ക്ഷണിച്ച 51 പേരില് 44 പേര് ഹാജരാവുകയും യോഗ്യത നേടിയ 38 പേരുടെ പേരുകള് നറുക്കെടുപ്പിന് ഉൾപ്പെടുത്തുകയും ചെയ്തു.
തെരഞ്ഞെടുക്കപ്പെടുന്ന മേല്ശാന്തി ക്ഷേത്രത്തിലെ ഭജനത്തിനു ശേഷം മാര്ച്ച് 31 ന് അടയാളചിഹ്നമായ താക്കോല്ക്കൂട്ടം ഏറ്റുവാങ്ങി പുറപ്പെടാ ശാന്തിയായി ചുമതലയേല്ക്കും. ദേവസ്വം ചെയര്മാന് ഡോ. വി.കെ. വിജയന്, ഭരണസമിതി അംഗങ്ങളായ മല്ലിശ്ശേരി പരമേശ്വരന് നമ്പൂതിരിപ്പാട്, സി. മനോജ്, അഡ്മിനിസ്ട്രേറ്റര് കെ.പി. വിനയന് എന്നിവരും ചടങ്ങില് പങ്കെടുത്തു.
