തിരുവനന്തപുരം: രണ്ടാം പിണറായി സര്ക്കാരിന്റെ ആറാമത്തെ ബജറ്റ് ഇന്ന് അവതരിപ്പിക്കുകയാണ്. നാടിന്റെ ഭാവിക്ക് മുതല്ക്കൂട്ടാകുന്ന പല പദ്ധതികളും പ്രഖ്യാപനങ്ങളും ബജറ്റിലുണ്ടാകുമെന്ന് ധനമന്ത്രി കെ എന് ബാലഗോപാല് ഫെയ്സ്ബുക്കില് കുറിച്ചു. എല്ഡിഎഫ് സര്ക്കാര് കേരളത്തിന് അനുഭവേദ്യമാക്കിയ വികസന വിപ്ലവത്തെ കൂടുതല് കരുത്തോടെ മുന്നോട്ടു കൊണ്ടുപോകാനുള്ള രേഖയായി ബജറ്റിനു മാറാന് കഴിയും എന്നാണ് പ്രതീക്ഷിക്കുന്നതെന്നും അദ്ദേഹം വ്യക്തമാക്കി.
രാവിലെ ഒമ്പതിന് ആണ് കെ എന് ബാലഗോപാല് നിയമസഭയില് ബജറ്റ് അവതരിപ്പിക്കുക. പിണറായി വിജയന്റെ നേതൃത്വത്തിലുള്ള രണ്ടാം എല്ഡിഎഫ് സര്ക്കാരിന്റെ അവസാന ബജറ്റാണിത്. ഇടതു സര്ക്കാരിന്റെ തുടര്ച്ചയായ ആറാം ബജറ്റ് കൂടിയാണിത്.
സംസ്ഥാന നിയമസഭ തെരഞ്ഞെടുപ്പ് അടുത്തിരിക്കുന്ന വേളയില്, ജനപ്രിയ പ്രഖ്യാപനങ്ങള് ഉണ്ടായേക്കുമെന്നാണ് സൂചന. സര്ക്കാര് ജീവനക്കാര് ശമ്പള പരിഷ്കരണം അടക്കം ആനുകൂല്യങ്ങള് പ്രതീക്ഷിക്കുന്നുണ്ട്. പങ്കാളിത്ത പെന്ഷന് പദ്ധതിക്ക് പകരം അഷ്വേര്ഡ് പെന്ഷന് സംവിധാനത്തിലേക്ക് മാറുന്ന പ്രഖ്യാപനം ബജറ്റിലുണ്ടാകും. അതിവേഗ പാതയും വിഴിഞ്ഞം അനുബന്ധ വികസന പദ്ധതികളും ബജറ്റ് പരിഗണനയില് ഉണ്ടാകുമെന്നാണ് കരുതുന്നത്. ക്ഷമ പെന്ഷന് അടക്കം ജനപ്രിയ പ്രഖ്യാപനങ്ങള്ക്ക് കേന്ദ്രത്തിന്റെ സാമ്പത്തിക ഉപരോധം മാത്രമാണ് തടസമെന്നാണ് ധനവകുപ്പ് പറയുന്നത്. സംസ്ഥാനത്തിന്റെ വരുമാനവും ചെലവും കടവും കൂടിയെന്നാണ് 2024-25 വര്ഷത്തെ സാമ്പത്തിക അവലോകന റിപ്പോര്ട്ടില് പറയുന്നത്.
