കേരളത്തിനും ഒഡിഷയ്ക്കും അടക്കം കടലോര മേഖലകളിൽ സമ്പന്നമായി നിലനിൽക്കുന്ന ധാതുസമ്പത്ത് ഫലപ്രദമായി ഉപയോഗപ്പെടുത്തുന്നതിനായി ധാതു ഖനന ഇടനാഴി സ്ഥാപിക്കുമെന്ന് കേന്ദ്ര ധനമന്ത്രി നിർമല സീതാരാമൻ ബജറ്റ് പ്രസംഗത്തിൽ പ്രഖ്യാപിച്ചു. ഇതിലൂടെ ധാതുക്കളുടെ ഇറക്കുമതി കുറയ്ക്കുകയും ആഭ്യന്തര ഉത്പാദനം ശക്തിപ്പെടുത്തുകയും ചെയ്യുകയാണ് ലക്ഷ്യമെന്ന് ധനമന്ത്രി വ്യക്തമാക്കി. കേരളത്തിന് വ്യവസായ-തൊഴിൽ മേഖലകളിൽ ഇത് ഗണ്യമായ പ്രയോജനങ്ങൾ നൽകുമെന്നാണ് പ്രതീക്ഷ. ഇത് നിർമല സീതാരാമൻ അവതരിപ്പിക്കുന്ന ഒൻപതാമത് കേന്ദ്ര ബജറ്റാണ്.
ഇന്ത്യ വളർച്ചയുടെ പാതയിൽ:
ആഗോളതലത്തിൽ സാമ്പത്തിക അനിശ്ചിതത്വം തുടരുന്ന സാഹചര്യത്തിലും ഇന്ത്യ ശക്തമായ വളർച്ച കൈവരിച്ചതായി ധനമന്ത്രി പറഞ്ഞു. രാജ്യത്ത് ഏഴ് ശതമാനം വളർച്ച നിലനിർത്താനായതായി അവർ ചൂണ്ടിക്കാട്ടി. കഴിഞ്ഞ 12 വർഷമായി രാജ്യത്തിന്റെ സാമ്പത്തിക മുന്നേറ്റം സ്ഥിരത, സാമ്പത്തിക അച്ചടക്കം, സുസ്ഥിര വളർച്ച, നിയന്ത്രിത പണപ്പെരുപ്പ് എന്നിവയാൽ അടയാളപ്പെടുത്തപ്പെടുന്നതായും, അനിശ്ചിതത്വങ്ങളെയും വെല്ലുവിളികളെയും മറികടന്ന് എടുത്ത ബോധപൂർവമായ തീരുമാനങ്ങളാണ് ഇതിന് അടിസ്ഥാനം എന്നും ധനമന്ത്രി വ്യക്തമാക്കി.
‘ചരിത്രപരമായ ബജറ്റ്’ – കേന്ദ്രമന്ത്രിസഭയുടെ അംഗീകാരം:
ധനമന്ത്രി അവതരിപ്പിച്ച ബജറ്റിന് കേന്ദ്രമന്ത്രിസഭയുടെ അംഗീകാരം ലഭിച്ചു. ഇത് ചരിത്രപരമായ ബജറ്റായിരിക്കുമെന്ന് പാർലമെന്ററി കാര്യ മന്ത്രി കിരൺ റിജിജു പറഞ്ഞു. വികസിത ഭാരതത്തിലേക്ക് രാജ്യത്തെ നയിക്കുന്ന പ്രധാനമന്ത്രിയുടെ ‘റിഫോം എക്സ്പ്രസ്’ അതിവേഗം മുന്നേറുകയാണെന്നും അദ്ദേഹം കൂട്ടിച്ചേർത്തു.
