കേന്ദ്ര ബജറ്റ് കേരളത്തെ സംബന്ധിച്ച് കടുത്ത നിരാശയുണ്ടാക്കിയതായി വ്യവസായ മന്ത്രി പി. രാജീവ് പ്രതികരിച്ചു. രാജ്യത്ത് ആദ്യമായി അതിവേഗ റെയിൽ പദ്ധതി മുന്നോട്ടുവച്ച സംസ്ഥാനമായ കേരളത്തെ ബജറ്റിൽ പൂർണമായി അവഗണിച്ചുവെന്ന് അദ്ദേഹം പറഞ്ഞു. കേന്ദ്രം പ്രഖ്യാപിച്ച ഏഴ് അതിവേഗ റെയിൽ പദ്ധതികളിൽ കേരളത്തെ ഉൾപ്പെടുത്താതിരുന്നത് വ്യക്തമായ വിവേചനമാണെന്നും മന്ത്രി കുറ്റപ്പെടുത്തി.
അതിനൊപ്പം, കേരളം ഏറെ പ്രതീക്ഷയോടെ കാത്തിരുന്ന എയിംസ് (AIIMS) പ്രഖ്യാപനവും ഇത്തവണത്തെ കേന്ദ്ര ബജറ്റിൽ ഉൾപ്പെടുത്തിയില്ല. തുടർച്ചയായി വീണ്ടും കേരളത്തിന് എയിംസ് ലഭിക്കാതിരുന്നത് ആരോഗ്യരംഗത്ത് സംസ്ഥാനത്തിന് വലിയ തിരിച്ചടിയാണെന്ന വിലയിരുത്തലും ഉയരുന്നു.
വികസന പദ്ധതികളിൽ കേരളത്തെ അവഗണിക്കുന്ന സമീപനമാണ് ബജറ്റിൽ പ്രതിഫലിക്കുന്നതെന്നും, ഇത് സംസ്ഥാനത്തിന്റെ അടിസ്ഥാന സൗകര്യ വികസനത്തെയും ആരോഗ്യ മേഖലയുടെ മുന്നേറ്റത്തെയും പ്രതികൂലമായി ബാധിക്കുമെന്നും നേതാക്കൾ അഭിപ്രായപ്പെട്ടു.
