റിയാദ്: പ്രവാസ ലോകത്തുനിന്ന് മലയാള സിനിമയിലേക്ക് കടന്നുവന്ന്, ആദ്യ സംവിധാന സംരംഭത്തിലൂടെ തന്നെ സംസ്ഥാന തലത്തിൽ ശ്രദ്ധേയനായി പ്രവാസി വ്യവസായി ഷാജു വാലപ്പൻ. വാലപ്പൻ ക്രിയേഷൻസിൻ്റെ ബാനറിൽ അദ്ദേഹം നിർമ്മിച്ച് സംവിധാനം ചെയ്ത ‘നിഴൽ വ്യാപാരികൾ’ എന്ന ചിത്രത്തിനാണ് മികച്ച നവാഗത സംവിധായകനുള്ള 49 മത് കേരള സംസ്ഥാന ഫിലിം ക്രിട്ടിക്സ് പുരസ്കാരം ലഭിച്ചത്. ഒരു പ്രവാസി വ്യവസായിയിൽ നിന്നും സാമൂഹിക പ്രതിബദ്ധതയുള്ള ഒരു ചലച്ചിത്രകാരനിലേക്കുള്ള അദ്ദേഹത്തിൻ്റെ ചുവടുവെപ്പിന് ലഭിച്ച ഏറ്റവും വലിയ അംഗീകാരമാണിത്.
ഒരു ദളിത് യുവാവിൻ്റെ അതിജീവനത്തിൻ്റെയും പോരാട്ടത്തിൻ്റെയും വൈകാരികമായ കഥ പറയുന്ന ‘നിഴൽ വ്യാപാരികൾ’, ആധുനിക ഇന്ത്യയുടെ നേർചിത്രമാണെന്ന് പുരസ്കാര നിർണ്ണയ വേളയിൽ ജൂറി വിലയിരുത്തി.
ഉന്നത വിദ്യാഭ്യാസം നേടിയിട്ടും സമൂഹത്തിൽ നിന്നും അവഗണന നേരിടേണ്ടി വരുന്ന ഒരു ദളിത് യുവാവ്, സമൂഹത്തിലെ അഴിമതിക്കും മായം ചേർക്കലിനുമെതിരെ നടത്തുന്ന ഒറ്റയാൾ പോരാട്ടമാണ് ചിത്രം വരച്ചുകാട്ടുന്നത്. കേവലം ഒരു ത്രില്ലർ എന്നതിലുപരി, സമൂഹത്തിൽ ഇന്നും നിലനിൽക്കുന്ന ജാതി വിവേചനങ്ങളുടെ ഇരുണ്ട കോണുകളിലേക്ക് വെളിച്ചം വീശുന്ന ഈ ചലച്ചിത്ര ശ്രമം നേരത്തെ തന്നെ ഏറെ നിരൂപക പ്രശംസ പിടിച്ചുപറ്റിയിരുന്നു.
സംസ്ഥാന തലത്തിൽ ലഭിച്ച ഈ വലിയ അംഗീകാരത്തിന് മുൻപേ തന്നെ ‘നിഴൽ വ്യാപാരികൾ’ രാജ്യാന്തര തലത്തിലും വലിയ നേട്ടങ്ങൾ സ്വന്തമാക്കിയിരുന്നു. പ്രശസ്തമായ രാജസ്ഥാൻ ഇന്റർനാഷണൽ ഫിലിം ഫെസ്റ്റിവലിലും (RIFF), തലസ്ഥാനത്ത് വെച്ച് നടന്ന 11-ാമത് സത്യജിത്ത് റേ ഗോൾഡൻ ആർക്ക് അവാർഡിലും മികച്ച നവാഗത സംവിധായകനുള്ള പുരസ്കാരങ്ങൾ ഷാജു വാലപ്പനെ തേടിയെത്തിയിരുന്നു. ഈ തുടർച്ചയായ പുരസ്കാര നേട്ടങ്ങൾ അദ്ദേഹത്തിന്റെ കലാപരമായ മികവിനുള്ള അടിവരയാണ്.
ദീർഘകാലമായി പ്രവാസിയായ ഷാജു വാലപ്പൻ, കലയോടുള്ള അടങ്ങാത്ത അഭിനിവേശം കൊണ്ടാണ് ചലച്ചിത്ര നിർമ്മാണ-സംവിധാന രംഗങ്ങളിലേക്ക് കടന്നുവന്നത്. ചുരുങ്ങിയ കാലം കൊണ്ടുതന്നെ മലയാള ചലച്ചിത്ര ലോകത്ത് തന്റെ വ്യക്തമായ സാന്നിധ്യം ഉറപ്പിക്കാൻ അദ്ദേഹത്തിന് കഴിഞ്ഞു.വാലപ്പൻ ക്രീയേഷന്സ് നിർമ്മിച്ച സ്വാലിഹ് എന്ന സിനിമ മികച്ച സാമൂഹ്യ പ്രസക്തിയുള്ള സിനിമയായും ,സിദ്ധിക്ക് പറവൂർ മികച്ച സംവിധായകനായും തെരഞ്ഞെടുക്കപ്പെട്ടു .വാലപ്പൻ ക്രീയേഷന്സ് നിർമ്മിച്ച ‘സ്വാലിഹ്’ എന്ന സിനിമ മികച്ച സാമൂഹ്യ പ്രസക്തിയുള്ള സിനിമയായും ,സിദ്ധിക്ക് പറവൂർ മികച്ച സംവിധായകനായും തെരഞ്ഞെടുക്കപ്പെട്ടു .
