വെഞ്ഞാറമൂടിന് സമീപമുള്ള ഹാപ്പിലാൻഡ് അമ്യൂസ്മെൻ്റ് പാർക്കിൽ ഉണ്ടായ അപകടവുമായി ബന്ധപ്പെട്ട് പോലീസ് കേസ് രജിസ്റ്റർ ചെയ്തു. റൈഡ് തകർന്നുണ്ടായ അപകടത്തിൽ നിരവധി പേർക്ക് പരിക്കേറ്റിരുന്നു.
വെഞ്ഞാറമൂട് പോലീസ് സ്റ്റേഷനിലാണ് കേസ് രജിസ്റ്റർ ചെയ്തിരിക്കുന്നത്. പരിക്കേറ്റവരിൽ ചിലരുടെ നില ഗുരുതരമാണെന്നും ഒരേ കുടുംബത്തിലെ നിരവധി പേർക്ക് അപകടത്തിൽ പരിക്കേറ്റതായും റിപ്പോർട്ടുണ്ട്.
അപകടസ്ഥലം സന്ദർശിച്ച വില്ലേജ് ഓഫീസർ ജില്ലാ കലക്ടർക്ക് റിപ്പോർട്ട് സമർപ്പിക്കുമെന്ന് അറിയിച്ചു. സംഭവത്തിന് പിന്നാലെ പാർക്കിലെ സുരക്ഷാ ക്രമീകരണങ്ങൾക്കെതിരെ വ്യാപക വിമർശനമാണ് ഉയരുന്നത്.
സുരക്ഷാ മാനദണ്ഡങ്ങൾ പാലിക്കുന്നതിൽ വീഴ്ച ഉണ്ടായോയെന്ന് പരിശോധിക്കുമെന്ന് അധികൃതർ അറിയിച്ചു. പരിക്കേറ്റവർക്ക് മികച്ച ചികിത്സ ഉറപ്പാക്കാൻ ജില്ലാ ഭരണകൂടത്തിന് നിർദേശം നൽകിയതായും സമാന സ്ഥാപനങ്ങളിൽ സുരക്ഷാ പരിശോധന ശക്തമാക്കുമെന്നും ടൂറിസം വകുപ്പ് മന്ത്രി പിസി വിഷ്ണുനാഥ് അറിയിച്ചു.
അപകടത്തിന് പിന്നാലെ രക്ഷാപ്രവർത്തനത്തിൽ കാലതാമസം ഉണ്ടായെന്നും സന്ദർശകരെ ഉടൻ ഒഴിപ്പിച്ചില്ലെന്നുമുള്ള ആരോപണങ്ങളും ഉയർന്നിട്ടുണ്ട്. കൂടുതൽ അന്വേഷണങ്ങൾ പൂർത്തിയാകുന്നത് വരെ പാർക്കിൻ്റെ പ്രവർത്തനം താൽക്കാലികമായി നിർത്തിവെച്ചിരിക്കുകയാണ്.
