തിരുവനന്തപുരം: സംസ്ഥാനത്ത് മനുഷ്യ-വന്യജീവി സംഘർഷം വർധിച്ചുവരുന്ന സാഹചര്യത്തിൽ അപകടകാരികളായ വന്യജീവികളെ നിയന്ത്രിക്കുന്നതുമായി ബന്ധപ്പെട്ട പ്രായോഗിക ബുദ്ധിമുട്ടുകൾ കേന്ദ്ര സർക്കാരിൻ്റെ ശ്രദ്ധയിൽപ്പെടുത്തുമെന്ന് സംസ്ഥാന വനംവകുപ്പ് മന്ത്രി ഷിബു ബേബി ജോൺ. പ്രശ്നപരിഹാരത്തിനായി സമഗ്രമായ പ്രവർത്തന പദ്ധതികൾ തയ്യാറാക്കുമെന്നും വനംമന്ത്രി നിയമസഭയിൽ അറിയിച്ചു.
നിയമസഭയിൽ ചോദ്യത്തിന് മറുപടി നൽകവെയാണ് മന്ത്രി ഇക്കാര്യം വ്യക്തമാക്കിയത്. വന്യമൃഗ ആക്രമണങ്ങൾ തടയുന്നതിനായി ശാസ്ത്രീയ ഉപകരണങ്ങളും ആധുനിക സാങ്കേതികവിദ്യകളും പ്രയോജനപ്പെടുത്തുന്ന സമഗ്ര തന്ത്രമാണ് സർക്കാർ ആവിഷ്കരിക്കുന്നതെന്നും അദ്ദേഹം പറഞ്ഞു.
ആക്രമണ സ്വഭാവമുള്ളതിനാൽ മാത്രം വന്യമൃഗങ്ങളെ കൊല്ലാൻ നിലവിലെ നിയമം അനുവദിക്കുന്നില്ലെന്ന് മന്ത്രി ചൂണ്ടിക്കാട്ടി. എന്നാൽ മനുഷ്യജീവന് ഭീഷണിയാകുന്ന വന്യമൃഗങ്ങളെ ഇല്ലാതാക്കാൻ ചീഫ് വൈൽഡ് ലൈഫ് വാർഡന് അധികാരമുണ്ടെന്നും അദ്ദേഹം വ്യക്തമാക്കി.
മനുഷ്യജീവനും വന്യജീവി സംരക്ഷണവും ഒരുപോലെ ഉറപ്പാക്കിക്കൊണ്ട് മനുഷ്യ-വന്യജീവി സംഘർഷം കുറയ്ക്കുന്നതിനുള്ള ദീർഘകാല പരിഹാരങ്ങൾ കണ്ടെത്താൻ സർക്കാർ ശ്രമിച്ചുവരുകയാണെന്നും മന്ത്രി വിശദീകരിച്ചു.
