സാനന്ദ്: ഗുജറാത്തിലെ സാനന്ദിൽ സി.ജി. സെമി ഔട്ട്സോഴ്സ്ഡ് സെമികണ്ടക്ടർ അസംബ്ലി ആൻഡ് ടെസ്റ്റ് (ഒസാറ്റ്) കേന്ദ്രം പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തു.
ഇന്ത്യയെ സെമികണ്ടക്ടർ നിർമ്മാണത്തിൻ്റെയും ഭാവി സാങ്കേതികവിദ്യകളുടെയും ആഗോള കേന്ദ്രമാക്കി മാറ്റാനുള്ള ശ്രമങ്ങൾക്ക് പുതിയ കേന്ദ്രം കൂടുതൽ കരുത്തേകുമെന്ന് പ്രധാനമന്ത്രി പറഞ്ഞു.
രാജ്യത്തിൻ്റെ ലക്ഷ്യങ്ങൾ യാഥാർത്ഥ്യമാക്കാനുള്ള ദൃഢനിശ്ചയത്തിൻ്റെ പ്രതീകമാണ് ഈ പദ്ധതിയെന്നും ശക്തമായ പ്രതിജ്ഞകളെ പ്രവർത്തിയിലൂടെ യാഥാർത്ഥ്യമാക്കുന്ന രാജ്യമാണ് ഇന്ത്യയെന്നും അദ്ദേഹം വ്യക്തമാക്കി.
സാമൂഹിക മാധ്യമമായ എക്സിൽ പരിപാടിയുടെ ദൃശ്യങ്ങൾ പങ്കുവെച്ച പ്രധാനമന്ത്രി, സാനന്ദിൽ എത്തി സി.ജി. സെമി ഒസാറ്റ് കേന്ദ്രം ഉദ്ഘാടനം ചെയ്യാൻ കഴിഞ്ഞതിൽ സന്തോഷമുണ്ടെന്നും ഈ സംരംഭം ഇന്ത്യയുടെ സെമികണ്ടക്ടർ മേഖലയെ കൂടുതൽ ശക്തിപ്പെടുത്തുമെന്നും പറഞ്ഞു.
സെമികണ്ടക്ടർ അസംബ്ലി, പാക്കേജിംഗ്, പരിശോധന എന്നീ മേഖലകളിൽ രാജ്യത്തിൻ്റെ ആഭ്യന്തര ശേഷി വർധിപ്പിക്കുന്നതിലും ഇന്ത്യയെ ആഗോള സെമികണ്ടക്ടർ ഹബ്ബായി വളർത്തുന്നതിനുള്ള കേന്ദ്ര സർക്കാരിൻ്റെ പദ്ധതികൾക്ക് ഈ സ്ഥാപനം കൂടുതൽ ഊർജം പകരുമെന്നാണ് വിലയിരുത്തൽ.
