ഇറ്റാനഗർ: ഇന്ത്യ-മ്യാൻമർ അതിർത്തിയിലെ അരുണാചൽ പ്രദേശ് ചാങ്ലാങ് ജില്ലയിലെ പാങ്സൗ പാസിലുള്ള അതിർത്തി ഹാട്ട് (Border Haat) ആറുവർഷത്തെ ഇടവേളയ്ക്കുശേഷം വീണ്ടും പ്രവർത്തനം ആരംഭിച്ചു. സംസ്ഥാന വ്യാപാര-വാണിജ്യ മന്ത്രി ന്യാറ്റോ ഡുകാം വ്യാഴാഴ്ച ഹാട്ടിൻ്റെ പുനരാരംഭം ഉദ്ഘാടനം ചെയ്തു.
നാംപോങ്ങിന് സമീപമുള്ള പാങ്സൗ പാസിലെ ബോർഡർ ഹാട്ട് പുനരാരംഭിച്ചതോടെ അതിർത്തി മേഖലയിലെ വ്യാപാര പ്രവർത്തനങ്ങൾക്കും ഇന്ത്യ-മ്യാൻമർ അതിർത്തി പ്രദേശങ്ങളിലെ ജനങ്ങൾ തമ്മിലുള്ള സാമ്പത്തിക സഹകരണത്തിനും പുതിയ ഉണർവ് ലഭിക്കുമെന്നാണ് പ്രതീക്ഷ.
ഉദ്ഘാടന ചടങ്ങിൽ സംസാരിച്ച മന്ത്രി ന്യാറ്റോ ഡുകാം, പ്രാദേശിക സാമ്പത്തിക വികസനത്തിന് വ്യാപാര പ്രവർത്തനങ്ങൾ നിർണായകമാണെന്ന് പറഞ്ഞു. അതിർത്തി വ്യാപാരത്തെ ശക്തവും സുസ്ഥിരവുമായ സാമ്പത്തിക സംവിധാനമാക്കി മാറ്റാൻ പ്രാദേശിക വ്യാപാരികളും ഭരണകൂടവും ഉൾപ്പെടെയുള്ള എല്ലാ പങ്കാളികളും സജീവമായി സഹകരിക്കണമെന്ന് അദ്ദേഹം ആഹ്വാനം ചെയ്തു.
അതിർത്തി ഹാട്ട് പ്രവർത്തനമാരംഭിക്കുന്നതോടെ അതിർത്തി മേഖലയിലെ ജനങ്ങളുടെ ഉപജീവന മാർഗങ്ങൾ മെച്ചപ്പെടുത്തുന്നതിന് സഹായകരമാകും. ഇതിനുപുറമെ നിയമാനുസൃത അതിർത്തി വ്യാപാരം പ്രോത്സാഹിപ്പിക്കുന്നതിനും ഇന്ത്യ-മ്യാൻമർ അതിർത്തി സമൂഹങ്ങൾ തമ്മിലുള്ള ബന്ധം കൂടുതൽ ശക്തിപ്പെടുത്തുന്നതിനും സഹായിക്കുമെന്ന് ഔദ്യോഗിക പ്രസ്താവനയിൽ അദ്ദേഹം അറിയിച്ചു.
