ന്യൂഡൽഹി: ജന്തർ മന്തറിൽ നടന്ന കോക്രോച്ച് ജനതാ പാർട്ടി (സിജെപി) നേതൃത്വത്തിലുള്ള പ്രതിഷേധത്തിൽ സമാധാനപരമായി പങ്കെടുത്ത വിദ്യാർത്ഥികൾക്ക് ഭീഷണിയുണ്ടെങ്കിൽ ആം ആദ്മി പാർട്ടി (എഎപി) സംരക്ഷണം നൽകുമെന്ന് ഡൽഹി എഎപി അധ്യക്ഷൻ സൗരഭ് ഭരദ്വാജ് അറിയിച്ചു.
‘ഡൽഹി GenZ’യെ അഭിസംബോധന ചെയ്ത് എക്സിൽ പങ്കുവെച്ച കുറിപ്പിലാണ് ഭരദ്വാജിൻ്റെ പ്രഖ്യാപനം. പ്രതിഷേധത്തിൽ പങ്കെടുത്ത ഏതെങ്കിലും വിദ്യാർത്ഥിക്ക് വലതുപക്ഷ സംഘങ്ങളിൽ നിന്ന് ഭീഷണി നേരിടുന്നുണ്ടെങ്കിൽ ഭയപ്പെടേണ്ടതില്ലെന്നും, പാർട്ടിയെ അറിയിച്ചാൽ ആവശ്യമായ പിന്തുണയും സംരക്ഷണവും നൽകുമെന്നും അദ്ദേഹം പറഞ്ഞു.
ഭരദ്വാജിൻ്റെ എക്സ് പ്ലാറ്റ്ഫോമിലെ പോസ്റ്റ് എഎപി ദേശീയ കൺവീനർ അരവിന്ദ് കെജ്രിവാളും പങ്കുവച്ചിട്ടുണ്ട്. ഇത് “പ്രധാന പ്രഖ്യാപനം” എന്ന് വിശേഷിപ്പിച്ച അദ്ദേഹം, വിദ്യാർത്ഥികളെ ഭീഷണിപ്പെടുത്തുന്നവർക്കെതിരെ എല്ലാവരും ഒന്നിച്ച് പ്രതികരിക്കുമെന്നും വ്യക്തമാക്കി.
സിജെപി നേതൃത്വത്തിൽ ജന്തർ മന്തറിൽ നടന്ന പ്രതിഷേധത്തിന് പിന്നാലെയാണ് എഎപിയുടെ ഈ പ്രതികരണം.
