ന്യൂഡൽഹി: ഇറാൻ പ്രസിഡൻ്റ് മസൂദ് പെസെഷ്കിയാനുമായി രാഷ്ട്രപതി ദ്രൗപദി മുർമു ശനിയാഴ്ച കൂടിക്കാഴ്ച നടത്തി. രാഷ്ട്രപതി ഭവനിൽ നടന്ന കൂടിക്കാഴ്ചയിൽ ഇരുരാജ്യങ്ങളും തമ്മിലുള്ള സൗഹൃദബന്ധങ്ങളും പ്രാദേശിക സമാധാനവും ചർച്ചയായി.
ഇന്ത്യയിലേക്കുള്ള ആദ്യ സന്ദർശനത്തിനെത്തിയ പ്രസിഡൻ്റ് പെസെഷ്കിയാനെ രാഷ്ട്രപതി മുർമു സ്വാഗതം ചെയ്തു. ഇന്ത്യയുടെ ബ്രിക്സ് അധ്യക്ഷപദവിക്കാലത്ത് ഇറാൻ നൽകിയ പിന്തുണയ്ക്ക് അവർ നന്ദി അറിയിച്ചു.
ഇന്ത്യയും ഇറാനും തമ്മിലുള്ള ദീർഘകാല സൗഹൃദബന്ധങ്ങൾ, ശക്തമായ സാംസ്കാരിക ബന്ധങ്ങൾ, ജനങ്ങൾ തമ്മിലുള്ള സഹകരണം എന്നിവയും നേതാക്കൾ ചർച്ച ചെയ്തു.
മേഖലയിൽ ശാശ്വത സമാധാനം കൈവരിക്കുന്നതിനുള്ള ഇന്ത്യയുടെ പ്രതിബദ്ധത രാഷ്ട്രപതി മുർമു ആവർത്തിച്ചു. സംഘർഷങ്ങൾ സംഭാഷണത്തിലൂടെയും നയതന്ത്രത്തിലൂടെയും പരിഹരിക്കണമെന്നും അവർ ആവശ്യപ്പെട്ടു.
