ന്യൂഡൽഹി: പ്രധാനമന്ത്രി നരേന്ദ്ര മോദിയും ചൈനീസ് പ്രസിഡന്റ് ഷി ജിൻപിങ്ങും തമ്മിൽ ശനിയാഴ്ച കൂടിക്കാഴ്ച നടത്തി. ന്യൂഡൽഹിയിൽ നടക്കുന്ന ബ്രിക്സ് ഉച്ചകോടിക്കിടെയായിരുന്നു കൂടിക്കാഴ്ച. ഇന്ത്യ-ചൈന ഉഭയകക്ഷി ബന്ധത്തിലെ പുരോഗതിയും അതിർത്തി വിഷയങ്ങളും ചർച്ചയായി.
2025 ഓഗസ്റ്റിൽ ടിയാൻജിനിൽ നടന്ന കൂടിക്കാഴ്ചയ്ക്കുശേഷം ഇരുരാജ്യങ്ങളും തമ്മിലുള്ള ബന്ധത്തിൽ ഉണ്ടായ പുരോഗതിയെ നേതാക്കൾ സ്വാഗതം ചെയ്തു. ഉഭയകക്ഷി ബന്ധങ്ങളെ തന്ത്രപരവും ദീർഘകാലാടിസ്ഥാനത്തിലുള്ളതുമായ കാഴ്ചപ്പാടോടെ സമീപിക്കേണ്ടതിന്റെ പ്രാധാന്യവും ഇരുവരും ആവർത്തിച്ചു.
വ്യത്യാസങ്ങൾ തർക്കങ്ങളായി മാറരുതെന്ന് പ്രധാനമന്ത്രി മോദി വ്യക്തമാക്കി. പരസ്പര ബഹുമാനം, പരസ്പര സംവേദനക്ഷമത, പരസ്പര താൽപര്യം എന്നീ മൂന്ന് ഘടകങ്ങൾ അടിസ്ഥാനമാക്കിയാകണം ഇരുരാജ്യങ്ങളുടെയും ബന്ധമെന്നും അദ്ദേഹം പറഞ്ഞു.
അതിർത്തി മേഖലകളിലെ സമാധാനവും ശാന്തതയും ഉഭയകക്ഷി ബന്ധങ്ങളുടെ തുടർവികസനത്തിന് അനിവാര്യമാണെന്ന് മോദി ചൂണ്ടിക്കാട്ടി. അതിർത്തി വിഷയങ്ങളുമായി ബന്ധപ്പെട്ട നിലവിലുള്ള കരാറുകളും ധാരണകളും ഇരുപക്ഷവും പാലിക്കണമെന്നും അദ്ദേഹം ആവശ്യപ്പെട്ടു.
അതിർത്തി പ്രശ്നത്തിന് നീതിപൂർവവും യുക്തിസഹവും പരസ്പരം അംഗീകരിക്കാവുന്നതുമായ പരിഹാരം കണ്ടെത്താനുള്ള പ്രതിബദ്ധത ഇരു നേതാക്കളും ആവർത്തിച്ചു. ഉഭയകക്ഷി ബന്ധങ്ങളുടെ വിശാലമായ രാഷ്ട്രീയ കാഴ്ചപ്പാടും ഇരു രാജ്യങ്ങളിലെയും ജനങ്ങളുടെ ദീർഘകാല താൽപര്യങ്ങളും പരിഗണിച്ചായിരിക്കും പരിഹാരം തേടുക.
ജനങ്ങൾ തമ്മിലുള്ള ബന്ധം ശക്തിപ്പെടുത്തൽ, സാംസ്കാരിക കൈമാറ്റം, വ്യാപാര ബന്ധങ്ങൾ, ഇരുരാജ്യങ്ങൾക്കുമിടയിലെ യാത്രാ സൗകര്യങ്ങൾ എന്നിവയും നേതാക്കൾ ചർച്ച ചെയ്തു.
വ്യാപാര-സാമ്പത്തിക ബന്ധങ്ങളിൽ ഘടനാപരമായ വ്യാപാര അസന്തുലിതാവസ്ഥ, വിതരണ ശൃംഖലാ പ്രശ്നങ്ങൾ എന്നിവ ഉൾപ്പെടെയുള്ള പരസ്പര ആശങ്കകൾ പരിഹരിക്കേണ്ടതിന്റെ ആവശ്യകതയും അവർ ചൂണ്ടിക്കാട്ടി. പ്രവചനാതീതമല്ലാത്തതും പ്രയോജനപ്രദവുമായ വിപണി പ്രവേശനം ഉറപ്പാക്കണമെന്നും നേതാക്കൾ വ്യക്തമാക്കി.
പ്രാദേശിക, ആഗോള വിഷയങ്ങളിൽ പൊതുവായ ധാരണ വിപുലീകരിക്കുന്നതിനും വിവിധ വെല്ലുവിളികൾ നേരിടുന്നതിന് സഹകരിക്കുന്നതിനും ഇരുപക്ഷവും ധാരണയിലെത്തി.
ഇന്ത്യയുടെ ബ്രിക്സ് അധ്യക്ഷപദവിക്ക് ചൈന നൽകിയ പിന്തുണയ്ക്കും 2026ലെ ബ്രിക്സ് ഉച്ചകോടിയുടെ വിജയത്തിനായി നൽകിയ സംഭാവനകൾക്കും പ്രധാനമന്ത്രി മോദി നന്ദി അറിയിച്ചു.
