ന്യൂഡൽഹി: ഏഷ്യൻ ഗെയിംസിൽ മെഡൽ നേടിയ ഇന്ത്യൻ താരങ്ങളെയും ടീമുകളെയും പ്രധാനമന്ത്രി നരേന്ദ്ര മോദി അഭിനന്ദിച്ചു.
വനിതകളുടെ 10,000 മീറ്റർ ഓട്ടത്തിൽ വെങ്കലം നേടിയ സീമയെ പ്രധാനമന്ത്രി അഭിനന്ദിച്ചു. വർഷങ്ങൾക്ക് ശേഷം ഈ ഇനത്തിൽ ഇന്ത്യയ്ക്ക് മെഡൽ നേടിക്കൊടുത്ത പ്രകടനം ശ്രദ്ധേയമാണെന്നും സഹനശക്തിയും അച്ചടക്കവും വർഷങ്ങളായുള്ള കഠിനാധ്വാനവുമാണ് നേട്ടത്തിന് പിന്നിലെന്നും അദ്ദേഹം പറഞ്ഞു.
വെങ്കലം നേടിയ ഇന്ത്യൻ പുരുഷ ബാഡ്മിന്റൺ ടീമിനെയും മോദി അഭിനന്ദിച്ചു. മത്സരത്തിലുടനീളം ടീം മികച്ച പോരാട്ടവീര്യം കാഴ്ചവെച്ചതായി അദ്ദേഹം പറഞ്ഞു.
സ്കീറ്റ് മിക്സഡ് ടീം ഇനത്തിൽ വെങ്കലം നേടിയ പരിനാസ് ധലിവാൾ, അനന്ത്ജീത് സിങ് നരൂക എന്നിവരെയും പ്രധാനമന്ത്രി അഭിനന്ദിച്ചു. ഈ ഇനത്തിൽ ഏഷ്യൻ ഗെയിംസിൽ ഇന്ത്യ നേടുന്ന ആദ്യ മെഡലാണിതെന്ന് അദ്ദേഹം വ്യക്തമാക്കി. താരങ്ങൾക്ക് തുടർന്നും മികച്ച നേട്ടങ്ങൾ കൈവരിക്കാനാകട്ടെയെന്നും മോദി ആശംസിച്ചു.
