പാലക്കാട്: പാലക്കാട് മണ്ഡലത്തിലെ എൻ ഡി എ സ്ഥാനാർത്ഥി സി കൃഷ്ണകുമാറിന് വോട്ടഭ്യർത്ഥിച്ച് കേന്ദ്ര സഹമന്ത്രി സുരേഷ് ഗോപി. കൽപ്പാത്തി ഗ്രാമത്തിലായിരുന്നു ഇരുവരും ഒന്നിച്ച് പ്രചാരണം നടത്തിയത്. തെരഞ്ഞെടുപ്പ് പൊതുയോഗത്തിന് ശേഷം വീടുകയറി ഇറങ്ങിയ മന്ത്രിയും സ്ഥാനാർത്ഥിയും മണ്ഡലത്തിലെ വികസന കാര്യങ്ങൾ ജനങ്ങളുമായി പങ്കുവെച്ചു. കൽപ്പാത്തി സംഗീതോത്സവത്തിന് സ്ഥിരം വേദി ഒരുക്കാൻ മണ്ഡലത്തിൽ നിന്ന് വിജയിച്ചാൽ പരിശ്രമിക്കുമെന്ന് സി കൃഷ്ണകുമാർ പറഞ്ഞു. കൽപ്പാത്തി സംഗീതോത്സവുമായി ബന്ധപ്പെട്ട ഒരു ആവശ്യവുമായി ആരും ഇതുവരെ കേന്ദ്രത്തെ സമീപിച്ചിട്ടില്ലെന്നും അത്തരം ആവശ്യം ഉയർന്നാൽ അർഹമായ പരിഗണന കേന്ദ്രത്തിൻ്റെ ഭാഗത്ത് നിന്നുണ്ടാകുമെന്നും സുരേഷ് ഗോപി പറഞ്ഞു.ജൈനിമേട് താമരക്കുളത്ത് നിന്നാണ് സ്ഥാനാർത്ഥി രാവിലെ പര്യടനം ആരംഭിച്ചത്.പ്രധാനമന്ത്രി ഭവന പദ്ധതി പ്രകാരം വീടുകൾ ലഭിച്ച നിരവധി ഗുണഭോക്താക്കളെ സ്ഥാനാർത്ഥി കണ്ടുമുട്ടി .മോദി സർക്കാരിൻ്റെ വികസന നേട്ടങ്ങൾ കൂടുതൽ ജനങ്ങളിലെത്തിക്കാൻ പിൻതുണ തേടികറുകോടിയിൽ നഗരസഭാ മൂന്നാം വാർഡ് കൗൺസിലറും ബി.ജെ.പി സോണൽ സെക്രട്ടറിയുമായ വി നടേശൻ്റെ വസതി സ്ഥാനാർത്ഥി സന്ദർശിച്ചു. നഗരസഭയിലെ മുതിർന്ന ബി.ജെ.പി കൗൺസിലറായ നടേശൻ ആരോഗ്യ പ്രശ്നങ്ങളെ തുടർന്ന് വിശ്രമത്തിലാണ്. തെരഞ്ഞെടുപ്പ് പോരാട്ടത്തിന് എല്ലാ പിൻതുണയും ഉറപ്പ് നൽകി.മഹാകവി ഒളപ്പമണ്ണയുടെ സഹധർമ്മിണി ശ്രീദേവി അന്തർജ്ജനത്തെയും സ്ഥാനാർത്ഥി സന്ദർശിച്ചു. എല്ലാ പിൻതുണയും അവർ ഉറപ്പ് നൽകി.മോദി സർക്കാർ നടപ്പാക്കുന്ന വിവിധ പദ്ധതികൾ പാവപ്പെട്ടവർക്ക് ആശ്രയമാകുന്നുണ്ടെന്ന് ശ്രീദേവി അന്തർജ്ജനം പറഞ്ഞു.തുടർന്ന് കേശവ നഗരം,ദേവി നഗർ തുടങ്ങിയ സ്ഥലങ്ങളിൽ പ്രചാരണം നടന്നു. ശ്രീ ശ്രീ നാരായണീയ സത്സംഗംഗീതാ പാരായണ ക്ളാസിനെത്തിയ അമ്മമാരോടും, സഹോദരിമാരോടും സ്ഥാനാർത്ഥി സംവദിച്ചു.
