ദില്ലി: ജസ്റ്റിസ് സഞ്ജീവ് ഖന്ന ഇന്ത്യയുടെ 51-ാമത് സുപ്രീംകോടതി ചീഫ് ജസ്റ്റിസായി ചുമതലയേറ്റു. രാഷ്ട്രപതി ദ്രൗപദി മുര്മു സത്യവാചകം ചൊല്ലിക്കൊടുത്ത ചടങ്ങിൽ ഉപരാഷ്ട്രപതിയും പ്രധാനമന്ത്രിയും ഉൾപ്പെടെ പ്രമുഖ വ്യക്തികൾ പങ്കെടുത്തു. ചീഫ് ജസ്റ്റിസ് ഡിവൈ ചന്ദ്രചൂഡിന്റെ ശുപാർശ പ്രകാരം ജസ്റ്റിസ് ഖന്നയെ ചീഫ് ജസ്റ്റിസ് പദവിയിലേക്ക് തിരഞ്ഞെടുത്തതായിരുന്നു.
2025 മെയ് 13 വരെ ചീഫ് ജസ്റ്റിസായി സേവനം നൽകുന്ന ജസ്റ്റിസ് സഞ്ജീവ് ഖന്ന, ദില്ലി ഹൈക്കോടതിയിലെ അഡീഷണൽ ജഡ്ജിയായി 2005 ജൂണിൽ നിയമിതനായി തുടക്കം കുറിച്ചു. 2019ൽ സുപ്രീംകോടതി ജഡ്ജിയായി ഉയർത്തപ്പെട്ട ഖന്ന, ദില്ലിയിലെ സെന്റ് സ്റ്റീഫൻസ് കോളജിൽ നിന്ന് ബിരുദവും, യൂണിവേഴ്സിറ്റി കാംപസ് ലോ സെന്ററിൽ നിന്ന് നിയമബിരുദവും നേടി.
